सावित्री प्रथमं चापि भक्त्या वै परिपूजिता
आदौ सरस्वती देवी ब्रह्मणा परिपूजिता
प्रथमं पूजिता राधा गोलोके रासमण्डले
गोपिकाभिश्च गोपैश्च बालिकाभिश्च बालकैः
तदा ब्रह्मादिभिर्देवैर्मुनिभिर्मनुभिस्तथा। पुष्पधूपादिभिर्भक्त्या पूजिता वन्दिता सदा।।2.1.
पृथिव्यां प्रथमे देवी सुयज्ञेन च पूजिता
त्रिषु लोकेषु तत्पश्चादाज्ञया परमात्मनः
कला या याः सुसंभूताः पूजितास्ताश्च भारते
एवं ते कथितं सर्वं प्रकृतेश्चरितं शुभम्
नारद उवाच विबोधनार्थं बोधस्य व्यासतो वक्तुमर्हसि
सृष्टेराद्या सृष्टिविधौ कथमाविर्बभूव ह
भूता या याश्च कलया तया त्रिगुणया भवे
तासां जन्मानुकथनं ध्यानं पूजाविधिं परम्
श्रीनारायण उवाच विश्वेषां गोकुलं नित्यं नित्यो गोलोक एव च
तदेकदेशो वैकुण्ठो लम्बभागः स नित्यकः
यथाऽग्नौ दाहिका चन्द्रे पद्मे शोभा प्रभा रवौ
विना स्वर्णं स्वर्णकारः कुण्डलं कर्तुमक्षमः
नहि क्षमस्तथा ब्रह्मा सृष्टिं स्रष्टुं तया विना
ऐश्वर्य्यवचनः शक् च तिः पराक्रमवाचकः 2.2.
समृद्धिबुद्धिसम्पत्तियशसां वचनो भगः
तया युक्तः सदाऽऽत्मा च भगवांस्तेन कथ्यते
तेजोरूपं निराकारं ध्यायन्ते योगिनः सदा
अदृश्यं सर्व द्रष्टारं सर्वज्ञं सर्वकारणम्
वैष्णवास्ते न मन्यन्ते तद्भक्ताः सूक्ष्मदर्शिनः
तेजोमण्डलमध्यस्थं ब्रह्म तेजस्विनं परम्
अतीवसुन्दरं रूपं बिभ्रतं सुमनोहरम्
नवीननीरदाभासं रासैकश्यामसुन्दरम्
मुक्तासारमहास्वच्छदन्तपङ्क्तिमनोहरम्
सुनासं सस्मितं शश्वद्भक्तानुग्रहकारकम् 2.2.
द्विभुजं मुरलीहस्तं रत्नभूषणभूषितम्