अधर्मपत्नी मिथ्या सा सर्वधूर्तैश्च पूजिता
सत्ये अदर्शना या च त्रेतायां सूक्ष्मरूपिणी
कलौ महाप्रगल्भा च सर्वत्र व्याप्तिकारणात्
शान्तिर्लज्जा च भार्ये द्वे सुशीलस्य च पूजिते
ज्ञानस्य तिस्रो भार्याश्च बुद्धिर्मेधा स्मृतिस्तथा 2.1.
मूर्त्तिश्च धर्मपत्नी सा कान्तिरूपा मनोहरा
सर्वत्र शोभारूपा च लक्ष्मीर्मूर्तिमती सती
कालाग्निरुद्रपत्नी च निद्रा या सिद्धयोगिनाम्
कालस्य तिस्रो भार्य्याश्च सन्ध्या रात्रिर्दिनानि च
क्षुत्पिपासे लोभभार्य्ये धन्ये मान्ये च पूजिते
प्रभा च दाहिका चैव द्वे भार्ये तेजसस्तथा
कालकन्ये मृत्युजरे प्रज्वरस्य प्रिये प्रिये
निद्राकन्या च तन्द्रा सा प्रीतिरन्या सुखप्रिये
वैराग्यस्य च द्वे भार्ये श्रद्धा भक्तिश्च पूजिते
अदितिर्देवमाता च सुरभिश्च गवां प्रसूः 2.1.
उपयुक्ताः सृष्टिविधावेताश्च प्रकृतेः कलाः
रोहिणी चन्द्रपत्नी च संज्ञा सूर्यस्य कामिनी
तारा बृहस्पतेर्भार्य्या वसिष्ठस्याप्यरुन्धती
देवहूतिः कर्दमस्य प्रसूतिर्दक्षकामिनी
लोपामुद्रा तथा हूतिः कुबेरस्य तु कामिनी
कुन्ती च दमयन्ती च यशोदा देवकी सती
वृषभानुप्रिया साध्वी राधामाता कलावती
रेवती सत्यभामा च कालिन्दी लक्ष्मणा तथा
लक्ष्मणा रुक्मिणी सीता स्वयं लक्ष्मीः प्रकीर्तिता
बाणपुत्री तथोषा च चित्रलेखा च तत्सखी 2.1.
रेणुका च भृगोर्माता हलिमाता च रोहिणी
बह्व्यः सन्ति कलाश्चैवं प्रकृतेरेव भारते
कलांशांशसमुद्भूताः प्रतिविश्वेषु योषितः
ब्राह्मणी पूजिता येन पतिपुत्रवती सती
कुमारी चाष्टवर्षीया वस्त्रालङ्कारचन्दनैः