जले स्थले चान्तरिक्षे शिशूनां स्वप्नगोचरा
प्रकृतेर्मुखसंभूता सर्वमङ्गलदा सदा
तेन मङ्गलचण्डी सा पण्डितैः परिकीर्त्तिता
पञ्चोपचारैर्भक्त्या च योषिद्भिः परिपूजिता
शोक सन्तापपापार्त्तिदुःखदारिद्र्यनाशिनी 2.1.
रुष्टा क्षणेन संहर्तुं शक्ता विश्वं महेश्वरी
दुर्गाललाटसंभूता रणे शुम्भनिशुम्भयोः
कोटिसूर्य्यप्रभाजुष्टदिव्यसुन्दरविग्रहा
सर्वसिद्धिप्रदा देवी परमा सिद्धियोगिनी कृष्णभावनया शश्वत्कृष्णवर्णा सनातनी
ब्रह्माण्डं सकलं हर्तुं शक्ता निःश्वासमात्रतः
धर्मार्थकाममोक्षांश्च दातुं शक्ता सुपूजिता
प्रधानांशस्वरूपा च प्रकृतिश्च वसुन्धरा
रत्नाकारा रत्नगर्भा सर्वरत्नाकराश्रया
सर्वोपजीव्यरूपा च सर्वसम्पद्विधायिनी
प्रकृतेश्च कला या यास्ता निबोध मुनीश्वर 2.1.
स्वाहादेवी वह्निपत्नी त्रिषु लोकेषु पूजिता
दक्षिणा यज्ञपत्नी च दीक्षा सर्वत्र पूजिता
स्वधा पितॄणां पत्नी च मुनिभिर्मनुभिर्नरैः
स्वस्तिदेवी वायुपत्नी प्रति विश्वेषु पूजिता
पुष्टिर्गणपतेः पत्नी पूजिता जगतीतले
अनन्तपत्नी तुष्टिश्च पूजिता वन्दिता सदा
ईशानपत्नी सम्पत्तिः पूजिता च सुरैर्नरैः
धृतिः कपिलपत्नी च सर्वैः सर्वत्र पूजिता
यमपत्नी क्षमा साध्वी सुशीला सर्वपूजिता
क्रीडाधिष्ठातृदेवी सा कामपत्नी रतिः सती 2.1.
सत्यपत्नी सती मुक्तिः पूजिता जगतां प्रिया
मोहपत्नी दया साध्वी पूजिता च जगत्प्रिया
पुण्यपत्नी प्रतिष्ठा सा पुण्यरूपा च पूजिता
सुकर्मपत्नी कीर्तिश्च धन्या मान्या च पूजिता
क्रिया उद्योगपत्नी च पूजिता सर्वसङ्गता