तपःस्वरूपा तपसां फलदात्री तपस्विनी
तपस्विनीषु पूज्या च तपस्विषु च भारते
ब्रह्मस्वरूपा परमा ब्रह्मभावनतत्परा
आस्तीकस्य मुनेर्माता प्रवरस्य तपस्विनाम्
मातृका सा पूज्यतमा सा च षष्ठी प्रकीर्त्तिता 2.1.
तपस्विनी विष्णुभक्ता कार्त्तिकेयस्य कामिनी
पुत्रपौत्रप्रदात्री च धात्री च जगतां सदा
स्थाने शिशूनां परमा वृद्धरूपा च योगिनी
पूजा च सूतिकागारे परषष्ठदिने शिशोः
शश्वन्नियमिता चैषा नित्या काम्याऽप्यतः परा
जले स्थले चान्तरिक्षे शिशूनां स्वप्नगोचरा
प्रकृतेर्मुखसंभूता सर्वमङ्गलदा सदा
तेन मङ्गलचण्डी सा पण्डितैः परिकीर्त्तिता
पञ्चोपचारैर्भक्त्या च योषिद्भिः परिपूजिता
शोक सन्तापपापार्त्तिदुःखदारिद्र्यनाशिनी 2.1.
रुष्टा क्षणेन संहर्तुं शक्ता विश्वं महेश्वरी
दुर्गाललाटसंभूता रणे शुम्भनिशुम्भयोः
कोटिसूर्य्यप्रभाजुष्टदिव्यसुन्दरविग्रहा
सर्वसिद्धिप्रदा देवी परमा सिद्धियोगिनी कृष्णभावनया शश्वत्कृष्णवर्णा सनातनी
ब्रह्माण्डं सकलं हर्तुं शक्ता निःश्वासमात्रतः
धर्मार्थकाममोक्षांश्च दातुं शक्ता सुपूजिता
प्रधानांशस्वरूपा च प्रकृतिश्च वसुन्धरा
रत्नाकारा रत्नगर्भा सर्वरत्नाकराश्रया
सर्वोपजीव्यरूपा च सर्वसम्पद्विधायिनी
प्रकृतेश्च कला या यास्ता निबोध मुनीश्वर 2.1.
स्वाहादेवी वह्निपत्नी त्रिषु लोकेषु पूजिता
दक्षिणा यज्ञपत्नी च दीक्षा सर्वत्र पूजिता
स्वधा पितॄणां पत्नी च मुनिभिर्मनुभिर्नरैः
स्वस्तिदेवी वायुपत्नी प्रति विश्वेषु पूजिता
पुष्टिर्गणपतेः पत्नी पूजिता जगतीतले