यशोमङ्गलधर्मश्रीसत्यपुण्यप्रदायिनी
शरणागतदीनार्तपरित्राणपरायणा
सर्वशक्तिस्वरूपा च शक्तिरीशस्य सन्ततम्
बुद्धिर्निद्रा क्षुत्पिपासा च्छाया तन्द्रा दया स्मृतिः
तुष्टिः पुष्टिस्तथा लक्ष्मीर्वृत्तिर्माता तथैव च 2.1.
उक्तः श्रुतौ श्रुतगुणश्चातिस्वल्पो यथागमम्
शुद्धसत्त्वस्वरूपा या पद्मा च परमात्मनः
कान्ता दान्ताऽतिशान्ता च सुशीला सर्वमङ्गला
त्यक्ताऽनुरक्ता पत्युश्च सर्वाद्या च पतिव्रता
सर्वसस्यात्मिका सर्वजीवनोपायरूपिणी
स्वर्गे च स्वर्गलक्ष्मीश्च राजलक्ष्मीश्च राजसु
सर्वेषु प्राणिद्रव्येषु शोभारूपा मनोहरा
वाणिज्यरूपा वणिजां पापिनां कलहङ्करी
चपले चपला भक्तसम्पदो रक्षणाय च
शक्तिर्द्वितीया कथिता वेदोक्ता सर्वसम्मता ।। 2.1.
वाग्बुद्धिविद्याज्ञानाधिदेवता परमात्मनः
सुबुद्धिः कविता मेधा प्रतिभा स्मृतिदा सताम्
व्याख्याबोधस्वरूपा च सर्वसंदेहभञ्जिनी
सर्वसङ्गीतसन्धानतालकारणरूपिणी
यया विना च विश्वौघो मूको मृतसमः सदा
शुद्धसत्त्वस्वरूपा या सुशीला श्रीहरिप्रिया
जपन्ती परमात्मानं श्रीकृष्णं रत्नमालया
सिद्धिविद्यास्वरूपा च सर्वसिद्धिप्रदा सदा
यथागमं यथाकिञ्चिदपरां संनिबोध मे
सन्ध्यावन्दनमन्त्राणां तन्त्राणां च विचक्षणा 2.1.
ब्राह्मण्यतेजोरूपा च सर्वसंस्कारकारिणी
तीर्थानि यस्याः संस्पर्शं दर्शं वाञ्छन्ति शुद्धये
परमानन्दरूपा च परमा च सनातनी
ब्रह्मतेजोमयी शक्तिस्तदधिष्ठातृदेवता
देवी चतुर्थी कथिता पञ्चमीं वर्णयामि ते