शैलः संभृतसंभारान्संभाषयितुमीश्वरान्
प्राङ्गणं कारयामास रम्भास्तम्भैः समन्वितम्
फलपल्लवसंयुक्तैः कलशैर्जलसंयुतैः
मालतीमाल्यसंयुक्तैः संयुक्तं सुमनोहरम्
रत्नसिंहासनं दातुं प्रेरयामास किङ्करान् 4.44.
विनतानन्दनात्तूर्णमवरुह्य चतुर्भुजः
रत्नमुष्टिनिबद्धैश्च सेवितः श्वेतचामरैः
ईषद्धास्यप्रसन्नास्यो भक्तानुग्रहकातरः
ऋषयो मुनयश्चैव समूषुर्मङ्गले स्थले
रत्नासने समुत्तिष्ठन्ददर्श पर्वतालयम्
वृद्धा बाला युवत्यश्च वस्त्राभरणभूषिताः
काश्चित्सिन्दूरहस्ताश्च काश्चित्कंकतिहाकराः
काश्चिन्निर्भूषिताः काश्चित्सर्वाभरणभूषिताः
ऋषिकन्या देवकन्या नागकन्या मनोहराः
सर्वा अप्सरसो दिव्या रम्भाद्या समुपस्थिताः 4.44.
चारुचम्पकवर्णाभमेकवक्त्रं त्रिलोचनम्
चन्दनागुरुकस्तूरीचारुकुङ्कुमभूषितम्
वह्निशौचेनातुलेन चातिसूक्ष्मेण चारुणा
रत्नदर्पणहस्तं च कज्जलोज्ज्वललोचनम्
अतीव तरुणं रम्यैर्भूषिताङ्गैश्च भूषितम्
योगस्वरूपं योगेशं योगीन्द्राणां गुरोर्गुरुम्
गुणभेदाद्रूपभेदं धत्तेऽनन्तमरूपकम्
सर्वाधारं सर्वबीजं सर्वेशं सर्वजीवनम् ।। साक्षिरूपं निरीहं च परमानन्दमक्षरम्
आद्यन्तमध्यरहितं सर्वाद्यं सर्वरूपकम्
प्रशशंसुर्युवत्यश्च धन्या धन्या सतीति ताः 4.44.
कामेन काश्चित्कामिन्यो मौनीभूताश्च स्तम्भिताः
काश्चिन्निमेषरहिता मूर्च्छामापुश्च काश्चन
काश्चिद्भावेन रुरुदुः पुलकाञ्चितविग्रहाः
दृष्ट्वा शंकररूपं च प्रहृष्टाः सर्वदेवताः
वादका वादयामासुर्नानाशिल्पेन तत्र वै