येन शुक्लीकृतं क्षीरं जलं शीतं कृतं पुरा
अतितेजः समुत्थाय तेजोरूपाय मूर्त्तये
सर्वस्मै सर्वबीजाय सर्वेषामन्तरात्मने
इत्युक्त्वा पुरतस्तस्यास्तस्थौ धर्मो जगद्गुरुः 4.42.
पद्मोवाच सर्वांतरेषु सर्वात्मा सर्वज्ञः सर्वतत्त्ववित्
कथं मनो मे विज्ञातुं विडंबयसि किंकरीम्
त्वं च शप्तो मयाऽज्ञानात्स्त्रीस्वभावात्क्रुधा विभो
आकाशोऽसौ दिशः सर्वा यदि नश्यन्ति वायवः
त्वं च नष्टो भवसि चेत्सृष्टिनाशो भवेत्तदा
सत्ये पूर्णश्चतुष्पादैः पौर्णमास्यां यथा शशी
पादक्षयश्च त्रेतायां भगवन्भविता तव
कलिशेषे शेषपादस्तवाच्छन्नो भविष्यति
सत्ये सर्वव्यापकस्त्वं तदन्येषु च कुत्रचित्
वैष्णवेषु च सर्वेषु यतिषु ब्रह्मचारिषु 4.42.
नृपेषु धर्मशीलेषु सत्सु सद्वैश्यजातिषु
एषु त्वं सततं पूर्णो धर्मराज विराजसे
अश्वत्थवटबिल्वेषु तुलसीचंदनेषु च
विवाहेषु च पुष्पेषु विद्यमानोऽसि शाखिषु
वेदवेदांगश्रवणे जलेषु च सभासु च । श्रीकृष्णगुणनामोक्त श्रुतिगीतस्थलेषु च
व्रतपूजातपोन्याययज्ञसाक्षिस्थलेषु च
कृशता तेन भविता धर्म तेषु स्थलेषु च
पुंश्चलीषु च सर्वासु गृहेषु नरघातिनाम्
देवतागुरुविप्रेष्टपाल्यानां धनहारिषु
दुरोदरसुरापानकलहानां स्थलेषु च 4.42.
दस्युस्नेहेषु वादेषु तालच्छायासु गर्विषु
वृषवाहस्वर्णकारजीवहिंसोपजीविषु
दीक्षासंध्याविष्णुभक्तिविहीनेषु द्विजेषु च
शालग्रामसुरग्रंथभूमिविक्रयिषु प्रभो
शरणागतदीनेषु चाश्रितघ्नेषु नृष्वपि
कामात्क्रोधात्तथा लोभान्मिथ्यासाक्षिप्रवादिषु