दीप्तं रत्नप्रदीपैश्च धूपेन सुरभीकृतम्
परितो वर्तुलाकारं तत्रैव रासमण्डलम्
पुष्पोद्यानैः पुष्पितैश्च युक्तक्रीडासरोवरैः
क्रीडनीयैः सुन्दरैश्च सुरतश्रमहारिभिः
दधिपूर्णशुक्लधान्यजलैर्निर्मञ्छनीकृतम्
आम्रपल्लवयुक्तेन सूत्रबन्धेन चारुणा
मालतीमाल्यसंयुक्तैर्नारिकेलफलान्वितैः
चकार तत्र कुतुकाद्विनोदमुरलीरवम्
तच्छ्रुत्वा राधिका सद्यो मुमोह मदनातुरा
क्षणेन चेतनां प्राप्य पुनः शुश्राव सा ध्वनिम् 4.28.
त्यक्त्वा चावश्यकं कर्म निःससार द्रुतं गृहात्
ध्यायन्ती चरणाम्भोजं श्रीकृष्णस्य महात्मनः
बहिर्बभूवुस्तास्त्रस्ता वरेण हृतचेतनाः
त्रयस्त्रिंशद्वयस्याश्च ताः सुशीलादयः स्मृताः
तासां पश्चाद्ययुर्गोप्यस्तासां संख्या निबोध मे
ययुः सुशीलासंगेन सहस्राणि च षोडश
एकादशसहस्राणि माधव्याल्यश्च निर्ययुः
ययुः कुन्तीवयस्याश्च सहस्राणि दश स्मृताः
जाह्नवीसहचारिण्यः सहस्राणि ययुर्नव
सावित्र्याल्यः पंचदश सहस्राणि ययुर्व्रजात् 4.28.
स्वयंप्रभानुगाः सप्त सहस्राणि ययुर्व्रजात्
शुभानुगा ययुर्गोप्यः सहस्राणि चतुर्दश
गौरी पद्मा ययुर्गोप्यः सहस्राणि चतुर्दश
कालिकाल्यो ययुर्गोप्यः सहस्राणि च षोडश
दुर्गानुगा ययुर्गोप्यः सहस्राणि च षोडश
प्रजग्मुर्भारतीपश्चात्सहस्राणि दश व्रजात्
रतिपश्चाद्वयस्याश्च सहस्राणि ययुर्दश
प्रजग्मुरम्बिकापश्चात्सहस्राणि च षोडश
नन्दिनीसहचारिण्यः सहस्राणि ययुर्दश ।। प्रययुः सुन्दरीपश्चात्सहस्राणि त्रयोदश
ययुः कृष्णप्रियापश्चात्सहस्राणि च षोडश 4.28.