मालावत्युवाच विना येन शवाः सर्वे प्राणिनो जगतीतले
निर्लिप्तं साक्षिरूपं च सर्वेषां सर्वकर्मसु 1.18.
येन सृष्टा च प्रकृतिः सर्वाधारो परात्परा
जगत्स्रष्टा स्वयं ब्रह्मा नियतो यस्य सेवया
ध्यायन्ते यं सुराः सर्वे मुनयो मनवस्तथा
साकारं च निराकारं परं स्वेच्छामयं विभुम्
तपःफलं तपोबीजं तपसां च फलप्रदम्
सर्वाधारं सर्वबीजं कर्म तत्कर्मणां फलम्
स्वयंतेजःस्वरूपं च भक्तानुग्रहविग्रहम्
तत्तेजो मण्डलाकारं सूर्यकोटिसमप्रभम्
नवीननीरदश्यामं शरत्पङ्कजलोचनम्
कोटिकन्दर्पलावण्यं लीलाधाम मनोहरम् ।। 1.18.
द्विभुजं मुरलीहस्तं पीतकौशेयवाससम्
गोपाङ्गनापरिवृतं कुत्रचिन्निर्जने वने
कुत्रचिद्गोपवेषं च वेष्टितं गोपबालकैः
निकरं कामधेनूनां रक्षन्तं शिशुरूपिणम्
वेणुं क्वणन्तं मधुरं गोपीसम्मोहकारणम्
लक्ष्मीकान्तं पार्षदैश्च सेवितं च चतुर्भुजैः
श्वेतद्वीपे विष्णुरूपं पद्मया परिषेवितम्
शिवस्वरूपं शिवदं स्वांशेन शिवरूपिणम्
स्वयं महद्विराड्रूपं विश्वौघं यस्य लोमसु
नानावतारं बिभ्रन्तं बीजं तेषां सनातनम् 1.18.
प्राणरूपं प्राणिनां च परमात्मानमीश्वरम्
निर्लक्ष्यं च निरीहं च सारं वाङ्मनसोः परम्
पञ्चवक्त्रश्चतुर्वक्त्रो गजवक्त्रः षडाननः
यं स्तोतुं न क्षमा श्रीश्च जडीभूता सरस्वती
किं स्तौमि तमनीहं च शोकार्त्ता स्त्री परात्परम्
कृपानिधिं प्रणनाम भयार्ता च पुनः पुनः
भर्तुरस्यान्तरे तस्याः परमात्मा निराकृतिः
प्रणनाम देवसंघं ब्राह्मणं पुरतः स्थितम्