चारु चम्पकवृक्षैश्च पुष्पितैः सुमनोहरैः 4.17.
आम्रैर्गुडालैः पनसैः खर्जूरैर्नारिकेलकैः
तुङ्गैराम्रातकैर्जम्बुसमूहैश्च फलान्वितैः
सर्वतः शोभिताभिश्च फलैस्तैः पुष्पितैरहो
परिखानां रहः स्थाने चकार मार्गमुत्तमम्
संकेतेन मणिस्तम्भैश्छादितैः स्वल्पपाथसा
परिखोपरिभागे च प्राकारं सुमनोहरम्
प्रस्तरस्य प्रमाणं च पञ्चविंशतिहस्तकम्
बाह्ये द्वाभ्यां च संयुक्तमन्तरे सप्तभिस्तथा
स्वर्णसारविनिर्माणकलशोज्ज्वलशेखरम् 4.17.
राजमार्गाश्च विविधान्स च चारूंश्चकार ह
पारावारे च परितो निबन्धांश्च मनोहरान्
सर्वतो दक्षिणे वामे ज्वलद्भिश्च विराजितान्
सुन्दरं मण्डलाकारं मणिप्राकारसंयुतम्
मणिसारविकारैश्च मण्डपैर्नवकोटिभिः
नानाजातिप्रसूनानां वायुना सुरभीकृतैः
पुष्पोद्यानैः पुष्पितैश्च सरोभिश्च सुशोभितम्
दृष्ट्वा वृन्दावनं रम्यं परितुष्टो बभूव ह
कृत्वा परिमितं बुद्ध्या मनसालोच्य यत्नतः
राधामाधवयोरेव क्रीडार्थं च विनिर्ममे 4.17.
वटमूलसमीपे च सरसः पश्चिमे तटे
पुनस्तयोश्च क्रीडार्थं चकार रत्नमण्डपम्
सद्रत्नसाररचितै राजितं तूलिकाशतैः
कपाटैर्नवभिर्युक्तं नवद्वारैर्मनोहरैः
परितः परितो भित्त्यामूर्ध्वं च परिशोभितम्
सद्रत्नसाररचितकलशोज्ज्वलशेखरम्
सर्वतः पुरतो दीप्तममूल्यरत्न दर्पणैः
शतहस्तप्रमाणं च प्रस्तारं वर्तुलाकृतिम्
वह्निशुद्धांशुकैर्वस्त्रैर्मालाजालविचित्रितैः
चन्दनागुरुकस्तूरीकुङ्कुमैः सुरभीकृतम् 4.17.