दशभागाधिकं चापि भूतादिपरिमाणकम्
यदभेद्यतमं लोके विज्ञेयं परमाणुवत्
प्रथमं तत्प्रमाणानां परमाणुं प्रचक्षते
त्रसरेणुः समाख्यातस्तत्पद्मरज उच्यते
ते ऽप्यष्टौ समवायस्था बालाग्रं तत्स्मृतं बुधैः
यूकाष्टकं यवप्राहुरङ्गुलं तु यवाष्टकम्
रत्निश्चागुलिपर्वाणि विज्ञेयो ह्येकविंशतिः
किष्कुर्द्विरत्निर्विज्ञेयो द्विचत्वारिंशदङ्गुलः
एतद्गव्यूतिसंख्यायामादानं धनुषः स्मृतम्
धनुषां त्रिशतं नल्वमाहुः संख्याविदो जनाः
अष्टौ धनुः सहस्राणि योजनं तु विधीयते
एतत्सहस्रं विज्ञेयं शक्रकोशान्तरं तथा
एतेन योजनाग्रेण शृणुध्वं ब्रह्मणोंऽतरे
दिवाकरात्सहस्रे तु शते चौर्द्ध्वं निशाकरः
नक्षत्रमण्डलं कृत्स्नमुपरिष्टात्प्रकाशत
ग्रहान्तरमथैकैकमूर्द्ध्वं नक्षत्रमण्डरात्
तस्योर्द्ध्वं चरते शुक्रस्तस्मादूर्द्ध्वं च लोहितः
उर्द्ध्वं शतसहस्रं तु योजनानां शनैश्चरात्
ऋषिभ्यस्तु सहस्राणां शतादूर्द्ध्वं विभाष्यते
उत्तानपादपुत्रो ऽसौ मेढीभूतो ध्रुवो दिवि
मन्वन्तरेषु देवानामिज्या यत्रैव लौकिकी
सर्वासां देवयोनीनां स्थितिहेतुः स वै स्मृतः
ध्रुवादूर्द्ध्वं महर्लोको यस्मिंस्ते कल्पवासिनः
द्वीकोट्यां तु महर्लोकाज्जनलोको व्यवस्थितः
यत्र ते ब्रह्मणः पुत्रा दक्षाद्याः साधकाः स्मृताः
षड्गुणं तु तपोलोकात्सत्यलोकान्तरं स्मृतम्
यस्मिन्न च्यवते भूयो ब्रह्मणं य उपासते
ऊर्द्ध्वभागस्ततोंऽडस्य ब्रह्मलोकात्परः स्मृतः
स चौर्द्ध्व संप्रचारो ऽस्य गत्यन्तश्चपरः स्मृतः
अधोगतीनां वक्ष्यामि भूतानां स्थानकल्पनाम्