तेनाहारेण संदीप्ताः सूर्याः सप्त भवन्त्युत
चतुर्लोकमिमं सर्वं दहन्ति शिखिनस्तदा
दीप्यन्ते भास्कराः सप्त युगान्ताग्निप्रतापिनः
स्वं समावृत्य तिष्ठन्ति निर्दहन्तो वसुंधराम्
साद्रिनद्यर्णवा पृथ्वी निस्नेहा समपद्यत
अधश्चोर्ध्वं च तिर्यक् च संरूद्धा सूर्यरश्मिभिः
एकत्वमुपयातानामेकज्वाला भवत्युत
चतुर्लोकमिदं सर्वं निर्दहत्याशु तेजसा
निर्वृक्षा निस्तृणा भूमिः कूर्मपृष्ठसमा भवेत्
सर्वमेव तदर्चिर्भिः पूर्णं जाज्वल्यते घनः
ततस्तानि प्रलीयन्ते भूमित्वमुपयान्ति च
सर्वं तद्भस्मसाच्चक्रे सर्वात्मा पावकस्तु सः
पिबत्यपः समिद्धो ऽग्निः पृथिवीमाश्रितो ज्वलन्
लोकान्संहरते दीप्तो घोरः संवर्त्तको ऽनलः
निर्दह्यान्ते तु पातालं वायुलोकमथादहत्
योजनानां सहस्राणि प्रयुतान्यर्बुदानि च
गन्धर्वांश्च पिशाचांश्च समहोरगराक्षसान्
भूर्लोकं च भुवर्ल्लोकं स्वर्लोकं च महस्तथा
व्याप्तेषु तेषु लोकेषु तिर्यगूर्द्ध्वमथाग्निना
अयोगुडनिभं सर्वं तदा ह्येवं प्रकाशते
उत्तिष्ठन्ति तदा घोरा व्योम्नि संवर्तका घनाः
केचिद्वैडूर्यसंकाशा इन्द्रनीलनिभाः परे
धूम्रवर्णा घनाः केचित्केचित्पीताःपयोधराः
मनशिलाभास्त्वपरे कपोताभास्तथांबुदाः
चाषपत्रनिभाः केचिदुत्तिष्ठन्ति घना दिवि
केचित्पर्वतसंकाशाः केचित्स्थलनिभा घनाः
बहुरूपा घोररूपा घोरस्वरनिनादिनः
ततस्ते जलदा घोरराविणो भास्करात्मकाः
ततस्ते जलदा वर्षं मुञ्चन्ति च महौघवत्
प्रवृष्टैश्च तथात्यर्थं वारिणा पूर्यते जगत्