वर्षो दिव्यस्तथाञ्जिष्ठो वर्चस्वी द्युतिमान्कविः
सुतारा नामतस्त्वेते देवा वै संप्रकीर्तिताः
द्युतिर्वसिष्ठपुत्रस्तु आत्रेयः सुतपास्तथा
तपोधनश्च पौलस्त्यः पौलहश्च तपोरतिः
एते सप्तर्षयः सिद्धा अन्त्ये सावर्णिकेंऽतरे
मित्रवान् मित्रसेनो ऽथ चित्रसेनो ह्यमित्रहा
त्रयोदशेतु पर्याये भाव्ये रौच्येन्तरे पुनः
ब्रह्मणो मानसाः पुत्रास्ते हि सर्वे महात्मनः
त्रिदशानां गणाः प्रोक्ता भविष्याः सोमपायिनाम्
आज्येन पृषदाज्येन ग्रहश्रेष्टेन चैव ह
सुत्रामाणः प्रयाज्यास्तु आज्याशा ये तु सांप्रतम्
उपयाज्याः सुधर्माण इति देवाः प्रकीर्त्तिताः
पुलहात्मजपुत्रास्ते विज्ञेयास्तु रुचेः सुताः
पौलहस्तत्त्वदर्शी छ भार्गवश्च निरुप्सुकः
सुतपाश्चैव वासिष्ठः सप्तैते तु त्रयोदश
अनेकः क्षत्रविद्धश्च सुरसो निर्भयो दश
चतुर्दशे तु पर्याये भौत्यस्याप्यन्तरे मनोः
चाक्षुषाश्च पवित्राश्च कनिष्ठा भ्राजितास्तथा
निषादाद्याः स्वराः सप्त सप्त तान्विद्धि चाक्षुषान्
सप्त लोकाः पवित्रास्ते भ्राजिताः सप्तसिंधवः
सर्वे मन्वन्तरेद्राश्च विज्ञेयास्तुल्यलक्षणाः
त्रैलोक्ये यानि सत्त्वानि गतिमन्ति ध्रुवाणि च
भूतापवादिनो हृष्टा मध्यस्था भूतवादिनः
अग्नीध्रः काश्यपश्चैव पौलस्त्यो मागधश्च यः
शुक्रश्चैव तु वासिष्ठः पौलहो मुक्त एव च
उरुर्गुरुश्च गंभीरो बुद्धः शुद्धः शुचिः कृती
सावर्णा मनवो ह्येते चत्वारो ब्रह्मणः सुताः
भौत्यस्यैवाधिपत्ये तु तूर्णं कल्पस्तु पूर्यते
निःशेषेषु तु सर्वेषु तदा मन्वन्तरेष्विह
सप्तैते भार्गवा देवा अन्ते मन्वन्तरे तदा