षडेव भविता त्समाद्विजयस्तु समानृपः
पुलोमारिः समाः सप्त ततश्चैषां भविष्यति
समाः शतानि चत्वारि पञ्चाशत्षट् तथैव च
सप्तैव तु भविष्यन्ति दशाभीरास्ततो नृपाः
यवनाष्टौ भविष्यन्ति तुषारास्तु चतुर्दश
अन्ध्रा भोक्ष्यन्ति वसुधां शते द्वे च शतञ्च वै
सप्त गर्दभिनश्चैव भोक्ष्यन्तीमां द्विसप्ततिम्
आशीती द्वे च वर्षाणि भोक्तारो यवना महीम्
शतान्यर्द्धचतुर्थानि भवितारस्त्रयोदश
शतानि त्रीणि भोक्ष्यन्ते मौना एकादशैव तु
ततः किलकिलेभ्यश्च विन्ध्यशक्तिर्भविष्यति
नृपान्वैदिशकांश्चाथ भविष्यांस्तु निबोधत
भोगी भविष्यते राजा नृपो नागकुलोद्वहः
धनधर्मा ततश्चापि चतुर्थो वंशजः स्मृतः
तस्य भ्राता यवीयांस्तु नाम्ना नन्दियशाः किल
दैहित्रः शिशिको नाम पूरिकायां नृपो ऽभवत्
भोक्ष्यते च समाः षष्टिं पुरीं काञ्चनकां च वै
तस्य पुत्रास्तु चत्वारो भविष्यन्ति नराधिपाः
सुप्रतीको गभीरश्च समा भोक्ष्यति विंशतिम्
पुष्पमित्रा भविष्यन्ति षट् स्त्रिमित्रास्त्रयोदश
कोमलायां तु राजानो भविष्यन्ति महाबलाः
नैषधाः पार्थिवाः सर्वे भविष्यन्त्यामनुक्षयात्
मगधानां महावीर्यो विश्वस्फाणिर्भविष्यति
कैवर्त्तान्मद्रकांश्चेव पुलिन्दान्ब्राह्मणांस्तथा
विश्वस्फाणिर्महासत्त्वो युद्धे विष्णुसमप्रभः
उत्सादयित्वा क्षत्रं तु क्षत्रमन्यत्करिष्यति
मथुरां च पुरा रम्यां नागा भोक्ष्यन्ति सप्त वै
एताञ्जनपदान्सर्वान्भोक्ष्यन्ते सप्तवंशजाः
एताञ्जनपदान्सर्वान्भोक्ष्यन्ते मणिधान्यजान्
चंपां चैव पुरीं रम्यां भोक्ष्यन्ते देवरक्षिताः