रेणुकायां कमल्यां तु तपोधृतिसमाधिना
सर्वविद्यान्तगं श्रेष्ठं धनुर्वेदस्य पारगम्
और्वस्यैवमृचीकस्य सत्यवत्यां महामनाः
मध्यमश्च शुनःशेफः शुनः पुच्छः कनिष्ठकः
जज्ञे भृगुप्रसादेन कौशिकान्वयवर्द्धनः
हरिश्चन्द्रस्य यज्ञे तु पशुत्वे नियतः स वै
देवैर्दत्तः स वै यस्माद्देवरातस्ततो ऽभवत्
मधुच्छन्दादयश्चैव कृतदेवौ ध्रुवाष्टकौ
तेषाङ्गोत्राणि बहुधा कौशिकानां महात्मनाम्
उदुंबराश्च वातड्यास्तलकायनचान्द्रवाः
बभ्रवः पणिनस्छैव ध्यानजप्यास्तथैव च
देवला यामदूताश्च शालङ्कायनबाष्कलाः
ऋष्यन्तरविवाह्यास्ते बहबः कौशिकाः स्मृताः
विश्वामित्रस्य पुत्राणां शुनःशेफो ऽग्रजः स्मृतः
अष्टकस्य सुतो लौहिः प्रोक्तो जह्नुगणो मया
किंलक्षणेन धर्मेण तपसेह श्रुतेन वा
येनयेनाभिधानेन ब्राह्मण्यं क्षत्रिया गताः
एवमुक्तस्ततो वाक्यमब्रवीदिदमर्थवत्
धर्माभिकाङ्क्षी यजते न धर्मफलमश्नुते
रागमोहान्वितो ह्यन्ते पावनार्थं ददाति यः
तस्य धर्मप्रवृत्तस्य हिंसकस्य दुरात्मनः
संक्लिष्टं कर्मणा दानं न तिष्ठति दुरात्मनः
कामाननभि संधाय यजते च ददाति च
दानेन भोगानाप्नोति स्वर्गं सत्येन गच्छति
सत्यं तु तपसः श्रेयस्तस्माज्ज्ञानं गुरु स्मृतम्
विश्वामित्रो नरपतिर्मान्धाता संकृतिः कपिः
आर्ष्टिषेणो ऽजमीढश्च भार्गव्योमस्तथैव च
रथान्तरः शौनकश्च विष्णुवृद्धादयो नृपाः
एते राजर्षयः सर्वे सिद्धिं तु महतीं गताः
अत ज्ञर्ध्वं प्रवक्ष्यामि आयोर्वंशं महात्मनः