योगपत्न्यश्च ताः सर्वाः सर्वास्ता योगमातरः
श्रद्धा लक्ष्मीर्धृतिस्तुष्टिः पुष्टिर्मेधा तथा क्रिया
पत्न्यर्थं प्रतिजग्राह धर्मो दाक्षायणीः प्रभुः
यान्याः शिष्टा यवीयस्य एकादश सुलोचनाः
सन्नतिश्चानसूया च ऊर्जा स्वाहा स्वधा तथा
रुद्रो भृगुर्मरीचिश्च अङ्गिराः पुलहः क्रतुः
सतीं भवाय प्रायच्छत्ख्यातिं च भृगवे तथा
प्रीतिं चैव पुलस्त्याय क्षमां वै पुलहाय च
ऊर्जां ददौ वसिष्ठाय स्वाहां चैवाग्नये ददौ
एताः सर्वा महाभागाः प्रजास्त्वनुसृताः स्थिताः
श्रद्धा कामं प्रजज्ञे ऽथ दर्पो लक्ष्मी सुतः स्मृतः
पुष्ट्या लाभः सुतश्चापि मेधापुत्रः श्रुतस्तथा
बुद्धेर्बोधः सुतश्चापि अप्रमादश्च तावुभौ
क्षेमः शान्तेः सुतश्चापि सुखं सिद्धेर्व्यजायत
कामस्य तु सुतो हर्षो देव्यां सिद्ध्यां व्यजायत
जज्ञे हिंसा त्वधर्माद्वै निकृतिं चानृतं च ते
माया च वेदना चापि मिथुनद्वयमेतयोः
वेदनायां ततश्चापि जेज्ञ दुःखं तु रौरवात्
दुःखोत्तराः स्मृता ह्येते सर्वे चाधर्मलक्षणाः
इत्येष तामसः सर्गो जज्ञे धर्मनिया मकः
सो ऽभिध्याय सतीं भार्यां निर्ममे चात्मसंभवान्
सहस्रं च सहस्राणामसृजत्कृत्तिवाससः
पिङ्गलान्सनिषङ्गांश्च कपर्दी नीललोहितान्
महारूपान्विरूपांश्च विश्वरूपाश्च रूपिणः
सहस्रशतबाहूंश्च दिव्यभौमान्तरिक्षगान्
अन्नादान्पिशितादांश्च आज्यपान्सोमपोस्तथा
सनिषङ्गतनुत्रांश्च धन्विनो ह्यसिचर्मिणः
अधीयानाश्च जपतो युञ्जतो ध्यायतस्तथा
बुद्धान्बुद्धतमांश्चैव ब्रह्मस्वान् ब्रह्मदर्शिनः
अदृश्यान्सर्वभूतानां महायोगान्महौजसः