अवेह्यस्मान्मुनिश्रेष्ठ गोकर्णनिलयान्मुनीन्
सतीर्थं तन्महाक्षेत्रं पतितं सागरांभसि
उपलब्धुमभीप्सामो भवतस्तु न संशयः
तस्मात्कर्तुमशक्यं ते त्रैलोक्ये ऽपि न किञ्चन
वयं त्वामागताः सर्वे रामैतदभियाचितुम्
दातुमर्हसि विप्रेन्द्र समुत्सार्यार्मवोदकम्
करणीयं च वः कृत्यं मया नात्र विचारणा
शस्त्रसंग्रहणाच्छक्यं मयापि न तदन्यथा
तपः समास्थितश्चर्तु प्रागेव पितृ शासनात्
प्रतिश्रुत्य सतां मध्ये तपः कर्त्तुमिहानघाः
किङ्कर्त्तव्यं मयात्रेति मम डोलायते मनः
तन्नच्यावयते सत्यद्यथोक्तं ब्रह्मणा पुरा
धर्म एव महांस्तेन चरितस्ते भविष्यति
तमनुद्रुत्य मेधावी धर्ममुद्दिश्य केवलम्
समुद्दिश्य चचौ राजन्द्रष्टुकामः सरित्पतिम्
तत्परं सरितां पत्युस्तीरं प्राप महामनाः
आकरं सर्वरत्नानां पूर्यमाणमनारतम्
दुष्पारपारं सर्वस्य विविधग्रहसंहतिम्
आत्मानमिव चात्मत्वे न्यक्कृताखिलमुद्धतम्
अत्यर्थचपलोत्तुगतरङ्गशतमालिनम्
विशीर्यमाणलहरीशतफेनौघसोभितम्
संसेव्यमानस्तरलैर्लहरीकणशीतलैः
विशश्रमे महाबाहुर्द्रष्टुकामः प्रचेतसम्
मेघगंभिरया वाचा वरुणं वाक्यमब्रवीत्
तस्मात्स्वरूपधृङ्मह्यं प्रचेतो देहि दर्शनम्
न चचाल निजस्थानान्नृप धीरतरस्त्वयम्
न ददौ दर्शनं तस्मै प्रतिवाच्यं च नाभ्यधात्
अत्यन्तमिति कार्यार्थी विदुषा समुपेक्षितम्
चुकोप तमभिप्रेक्ष्य रामः शस्त्रभृतां वरः
निस्तोयमर्णवं कर्तुमियेष रुषितो भृशम्