भारतादीनि वर्षाणि नदीभिः पर्वतैस्तथा
जंबूद्वीपादयो द्वीपाः समुद्रैः सप्तभिर्वृताः
सप्रमाणा इमे लोकाः सप्तद्वीपा च मेदिनी
सर्वं चैतत्प्रधानस्य परिणामैकदेशिकम्
सूर्याचन्द्रमसोश्चैव पृथिव्याश्चाप्यशेषतः
महेन्द्राद्याः शुभाः पुण्या मानसोत्तरमूर्धनि
नागवीथ्यक्षवीथ्योश्च लक्षणं च प्रकीर्त्यते
लोकालोकस्य सन्ध्याया अह्नो विषुवतस्तथा
पितॄणां देवतानां च पन्थानौ दक्षिणोत्तरौ
कीर्त्यते च पदं विष्णोर्धर्माद्या यत्र च स्थिताः
कीर्त्यते धृतसामर्थ्यात्प्रजानां च शुभाशुभम्
कीर्त्यते भगवान्येन प्रसर्प्पति दिवः क्षयम्
गन्धर्वैरप्सरोभिश्च ग्रामणीसर्पराक्षसैः
वृद्धिक्षयौ च सोमस्य कीर्त्येते सोमकारितौ
कीर्त्यते शिशुमारस्य यस्य पुच्छे ध्रुवः स्थितः
निवासा यत्र कीर्त्यन्ते देवानां पुण्यकर्मणाम्
प्रविभागश्चरश्मीनां नामतः कर्मतीर्थतः
वेश्यारूपात्प्रधानस्य परिमाणो महाद्भवः
पितॄणां द्विप्रकाराणां माहात्म्यं वा मृतस्य च
स्वर्गलोकगतानाञ्च प्राप्तानाञ्चाप्यधोगतिम्
युगसंख्याप्रमाणं च कीर्त्यते च कृतं युगम्
वर्णानामाश्रमाणां च संस्थितिर्धर्मतस्तथा
शब्दत्वं च प्रधानात्तु स्वायम्भुवमृते मनुम्
द्वापरस्य कलेश्चापि संक्षेपेण प्रकीर्त्तनम्
मन्वन्तराणां सर्वेषामेतदेव च लक्षणम्
तथा मन्वन्तराणां च प्रतिसंधानलक्षणम्
ऋषीणां च गतिः प्रोक्ता कालज्ञानगतिस्तथा
त्रेतायां चक्रवर्तीनां लक्षणं जन्म चैव हि
अङ्गुलैर्हासनं चैव भूतानां यच्च चोच्यते
वाक्यं सप्तविधं चैव ऋषिगोत्रानुकीर्तनम्