अनुगन्तुमिहेच्छामि तन्मे ऽनुज्ञातुमर्हथ
भर्त्रा विरहिता तेन प्रवर्त्तिष्ये विनिन्दिता
यथा तेन प्रवर्त्तिष्ये परत्रापि सहानिशम्
भर्तुर्मम भविष्यामि पितृलोकप्रियातिथिः
प्रतिभूय न वक्तव्यं यदि मत्प्रियमिच्छथ
अग्निं प्रविश्य भर्त्तारमनुगन्तुं मनोदधे
समाभाष्यातिगंभीरा वागुवाचाशरीरीणी
मा कार्षीः साहसं भद्रे प्रवक्ष्यामि प्रियं तव
न मर्त्तव्यन्त्वया सर्वो जीवन्भद्राणि पश्यति
निमित्तमन्तरीकृत्य किञ्चिदेव शुचिस्मिते
भवित्री चिररात्राय बहुकल्याण भाजनम्
तद्वाक्यगौरवाद्धर्षमवापुस्तनयाश्च ते
शाययित्वा निवाते तु परितः समुपाविशन्
निमत्तानि शुभान्यासन्ननेकानि महान्ति च
निषेदुः सहिता मात्रा काङ्क्षन्तो जीवितं पितुः
विधेर्बलेन मतिमांस्तत्रागच्छद्यदृच्छया
सर्वशास्त्रार्थवित्प्राज्ञः सकलासुरवन्दितः
यथाहतान्मृतान्देवैरुत्थापयति दानवान्
प्रणीतमनुजीवन्ति सर्वे ऽद्यापीह पार्थिवाः
ददर्श तदवस्थांस्तान्सर्वान्दुःखपरिप्लुतान्
उत्थायास्मै ददुश्चापि सत्कृत्य परमासनम्
पप्रच्छ किमिदं वृत्तं तत्सर्वं ते न्यवेदयन्
संजीविन्या विनया तं सिषेच प्रोच्चरन्निदम्
तेनासौ जीवताच्छीघ्रं प्रसुप्त इवचोत्थितः
समुत्तस्थावथार्चीकः साक्षाद्ग्ररुरिवापरः
ननाम भक्त्या नृपते कृताञ्जलिरुवाच ह
धन्यो ऽहं कृतकृत्यो ऽहं सफलं जीवितं च मे
भगवन्किं करोम्यद्य शुश्रूषां तव मानद
इत्युक्त्वा सहसाऽनीतं रामेणार्ध्यं मुदान्वितः
तज्जलं शिरसाधत्त सकुटुंबो महामनाः