यस्मिन्देशे पठ्यते मन्त्र एष तं वै देशं राक्षसा वर्जयन्ति
पवित्रपाणिश्च भवेन्न वा हि यः पुमान्न कार्यस्य फलं समश्नुते
मनसा काङ्क्षते यद्यत्तत्तद्यद्युः पितमहाः
भवन्त्येवं कृते श्राद्धे नित्यमेव प्रयत्नतः
विरणाश्चोतुवालाश्च लड्वा वर्ज्याश्च नित्यशः
अञ्जनाभ्यजनं गन्धान्सूत्रप्रणयनं तथा
काशाः पुनर्भवा ये च बर्हिणो ह्युपबर्हिणः
पुष्पगन्धविभूषाणामेष मन्त्र उदाहृतः
अन्यार्थे लौकिकं वापि जुहुयात्कर्मसिद्धये
समाहितेन मनसा प्रणीयाग्निं समन्ततः
सोमाय वै पितृमते स्वधा अङ्गिरसे पुनः
इत्येते होममन्त्रास्तु त्रयाणामनुपूर्वशः
एतयोरन्तरे नित्यं जुहुयाद्वै विवस्वते
होमजप्ये नमस्कारः प्रोक्षणं च विशेषतः
अञ्जनाब्यञ्जनं चैव पिण्डनिर्वपणं तथा
क्रिया सर्वा यथोद्दिष्टाः प्रयत्नेन समाचरेत्
विधूमे लेलिहाने च होतव्यं कर्मसिद्धये
यजमानो भवे दन्धः सो ऽमुत्रेति हि नः श्रुतम्
ज्वालाधूमापसव्यश्च स तु वह्निरसिद्धये
भूमिं वगाहते यत्र तत्र विद्यात्पराभवत्
स्निग्धः प्रदक्षिणश्चैव वह्निः स्यात्कार्यसिद्धये
अक्षयं पूजितास्तेन भवन्ति पितरो ऽग्नयः
श्राद्धे महापवित्राणि मेध्यानि च विशेषतः
पात्रेषु फलमुद्दिष्टं यन्मया श्राद्धकर्मणि
कृत्वा समाहितं चित्तमाग्नेयं वै करोम्यहम्
घृतमादाय पात्रे च जुहुयाद्धव्यवाहने
उदुंबरस्तथाबिल्वश्चन्दनो यज्ञियाश्च ये
समिदर्थे प्रशस्ताः स्युरेते वृक्षा विशेषतः
पूजिताः समिदर्थं ते पितॄणां वचनं यथा
फलं यत्कर्मणस्तस्य तन्मे निगदतः शृणु