दक्षिणस्यां तु पाणिभ्यां प्रथमं पिण्डमुत्सृजेत्
सव्योत्तराभ्यां पाणिभ्यां धर्मेर्ऽधं समतन्द्रितः
क्षौमं सूत्रं नवं दद्याच्छाणं कार्पासकं तथा
वर्जयेद्यक्षणं यज्ञे यद्यप्यहतवस्त्रजाम्
श्रेष्ठमाहुस्त्रिककुदमञ्जनं नित्यमेव च
चन्दनागुरुणी चोभे तमालोशीरपद्मकम्
शुक्लाः सुमनसः श्रेष्ठास्तथा पद्मोत्पलानि च
तथा हि सुमना नाडीरूपिकास्मकुरण्डिका
यथा गन्धादपेतानि चोग्रगन्धानि यानि च
द्विजातयो यथोद्दिष्टा नियताः स्युरुदङ्मुखाः
तेषामभिमुखो दद्याद्दर्भत्पिण्डांश्च यत्नतः
हरिता वै स पिञ्जालाः पुष्टाः स्निग्धाः समाहिताः
उपमूले तथा नीला विष्टरार्थं कुशोत्तमाः
पूर्वं कीर्त्तिमतां श्रेष्ठो बभूवाश्वः प्रजापतिः
तस्माद्देयाः सदा काशाः श्राद्धकर्मसु पूजिताः
प्रजाः पुष्टिद्युतिप्रज्ञाकीर्त्तिकान्तिसमन्विताः
सकृदेवास्तरेद्यर्भान्पिण्डार्थे दक्षिणामुखः
एकत्र चाधाय मनः श्राद्धं कुर्यात्समाहितः
रक्षांसि यक्षाः सपिशाचसंघा हता मया यातुधानाश्च सर्वे
शिवां हि बुद्धिं ध्रुवमिच्छमानः क्षिपेद्द्विचातिर्दिशमुत्तरां गतः
यस्मिन्देशे पठ्यते मन्त्र एष तं वै देशं राक्षसा वर्जयन्ति
पवित्रपाणिश्च भवेन्न वा हि यः पुमान्न कार्यस्य फलं समश्नुते
मनसा काङ्क्षते यद्यत्तत्तद्यद्युः पितमहाः
भवन्त्येवं कृते श्राद्धे नित्यमेव प्रयत्नतः
विरणाश्चोतुवालाश्च लड्वा वर्ज्याश्च नित्यशः
अञ्जनाभ्यजनं गन्धान्सूत्रप्रणयनं तथा
काशाः पुनर्भवा ये च बर्हिणो ह्युपबर्हिणः
पुष्पगन्धविभूषाणामेष मन्त्र उदाहृतः
अन्यार्थे लौकिकं वापि जुहुयात्कर्मसिद्धये
समाहितेन मनसा प्रणीयाग्निं समन्ततः