समुत्पन्नस्य पुलहादुत्पन्नास्तस्य ते सुताः
एतान्वैश्यगणाः श्राद्धे भाव यन्ति फलार्थिनः
ययातेर्जननी साध्वी पत्नी सा नहुषस्य च
हैरण्यगर्भस्य सुताः शूद्रास्तां भावयन्त्युत
एतेषां मानसी कन्या नर्मदा सरितां वरा
जननी सात्रसद्दस्योः पुरुकुत्सपरिग्रहः
मन्वन्तरादौ श्राद्धानि प्रवर्तयति सर्वशः
तस्मादेतत्स्वधर्मेण देयं श्राद्धं च श्रद्धया
दत्तं स्वधां पुरोधाय श्राद्धं प्रीणाति वै पितॄन्
सोमश्चाप्यायनं कृत्वा ह्यगनेर्वेवस्वतस्य च
पितरः पुष्टिकामस्य प्रजाकामस्य वा पुनः
देवकार्यादपि सदा पितृकार्यं विशिष्यते
न हि योग गतिः सूक्ष्मा पितॄणां न पितृक्षयः
इत्येते पितरश्चैव लोका दुहितरश्च वै
चत्वारो मूर्तिमन्तस्तु त्रयस्तेषाममूर्तयः
भक्त्या प्राञ्जलयः सर्वेसेंद्रास्तद्गतमानसाः
कृष्णाः श्वेतांबुजाश्चैव विधिव त्पूजयन्त्युत
मेघाश्च मरुतश्चैव ब्रह्माद्याश्च दिवौकसः
यक्षा नागाः सुपर्णाश्च किन्नरा राक्षसैः सह
एवमेते महात्मानः श्राद्धे सत्कृत्य पूजिताः
हित्वा त्रैलोक्यसंसारं जरामृत्युमयं तथा
कृत्स्नं वैराग्यमानन्त्यं प्रयच्छन्ति पितामहाः
योगैश्वर्यमृते मोक्षः कथञ्चिन्नोपपद्यते
वरिष्ठः सर्वधर्माणां मोक्षधर्मः सनातनः
मुक्तावैडूर्यवासांसि वाजिनागायुतानि च
हंसबर्हिणयुक्तनि मुक्तावैढूर्यवन्ति च
विमानानां सहस्राणि युक्तान्यप्सरसां गणैः
प्रीता नित्यं प्रयच्छन्ति मानुषाणां पितामहाः
इति श्रीब्रह्माण्डे महापुराणे वायुप्रोक्ते मध्यभागे तृतीये उपोद्धातपादे पितृराज्य कल्पो नाम दशमो ऽध्यायः
राजतस्य कथावापि दर्शनं दान मेव वा