एकार्षेयास्तथा चान्ये वसिष्ठा नाम विश्रुताः
इत्येते ब्रह्मणः पुत्रा मानसा अष्ट विश्रुताः
त्रींल्लोकान्धारयन्तीमान्देवर्षिगणसंकुलान्
व्याप्ता येस्तु त्रयो लोकाः सूर्यस्येव गभस्तिभिः
इति श्रीब्रह्माण्डे महापुराणे वायुप्रोक्ते मध्यभागे तृतीय उपोद्धातपादे ऋषिवंशवर्णनं नामाष्टमो ऽध्यायः
आसीद्दाक्षायणी पूर्वमुमा कथमजायत
के वै ते पितरो नाम येषां मेना तु मानसी
एकपर्णा तथा चैव तथा चैवैकपाटला
सर्वमेतत्वयोद्दिष्टं निर्देशं तस्य नो वद
पुत्राश्च के स्मृतास्तेषां कथं च पितरस्तु ते
स्वर्गे वै पितरो ह्येते देवानामपि देवताः
यथा च दत्तमस्माभिः सार्द्धं प्रीणाति वै पितॄन्
स्वर्गे तु के च वर्त्तन्ते पितरो नरके व के
प्रतितामहं तथा चैव त्रिषु पिण्डेषु नामतः
कथं च शक्तास्ते दातुं नरकस्थाः फलं पुनः
देवा अपि पितॄन् स्वर्गे यजन्तीति हि नः श्रुतम्
स्पष्टाभिधान मपि वै तद्भवान्वक्तुमर्हसि
मन्वन्तरेषु जायन्ते पितरो देवसूनवः
देवैः सार्द्धं पुरातीताः पितरो ऽन्येन्तरेषु वै
श्राद्धक्रियां मनुश्चैषां श्राद्धदेवः प्रवर्त्तयेत्
तमुत्सृज्य तदात्मानमयजंस्ते फलार्थिनः
तस्मात्किञ्चिन्न जानीत ततो लोकेषु मुह्यत
अनुग्रहाय लोकानां पुनस्तानब्रवीत्प्रभुः
पुत्रान्स्वान्परिपृच्छध्वं ततो ज्ञानमवाप्स्यथ
अपृच्छन्संयतात्मानो विधिवच्च मिथो मिथः
प्रयश्चित्तानि धर्मज्ञावाङ्मनः कर्मजानि च
यूयं वै पितरो ऽस्माकं यैर्वयं प्रतिबोधिताः
पुस्तानब्रवीद्ब्रह्मा यूयं वै सत्यवादिनः
उक्तं च पितरो ऽस्माकं चेति वै तनयाः स्वकाः
तेनैव वचसा ते वै ब्रह्मणः परमेष्ठिनः