पुष्पोत्कटां च वाकां च सुते माल्यवतस्तथा
ज्येष्ठं वैश्रवणं तस्य सुषुवे देववर्णिनी
राक्षसेन च रूपेण आसुरेण बलेन च
अष्टदंष्ट्रं हरिछ्मश्रुं शङ्कुकर्णं विलोहितम्
वैवर्त्तज्ञानसंपन्नं संबुद्धं चैव संभवात्
कुत्सायां क्विति शब्दो ऽयं शरीरं बेरमुच्यते
यस्माद्विश्रवसो ऽपत्यं सादृश्याद्विश्रवा इव
ऋद्रयां कुबेरो ऽजनयद्विश्रुतं नलकूबरम्
विभीषणचतुर्थांस्तु कैकस्यजनयत्सुतान्
चतुष्पाद्विंशतिभुजो महाकायो महाबलः
राक्षसेनौजसा युक्तो रूपेण च बलेन च
विसर्गदारुणः क्रूरो रावणो द्रावणस्तु सः
चतुर्युगानि राजाभूत् त्रयोदश स राक्षसः
नियुतान्येकषष्टिं च शरदां गणितानि वै
देवतानामृषीणां च घोरं कृत्वा प्रजागरम्
रामं दाशरथिं प्राप्य सगणः क्षयमीयिवान्
पुष्पोत्कटायाः पुत्रास्ते कन्या कुम्भीनसी तथा
कन्यानुपालिका चैव वाकायाः प्रसवः स्मृतः
दारुणाभिजनाः सर्वे देवैरपि दुरासदाः
यक्षाणां चैव सर्वेषां पौलस्त्या चे च राक्षसाः
वेदाध्ययनशीलानां तपोव्रतनिषेविणाम्
इतरे ये यज्ञजुषस्ते वै रक्षोगणास्त्रयः
निशाचरगणास्तेषां चत्वारः कविभिः स्मृताः
इत्येताः सप्त तेषां वै जातयो राक्षसाः स्मृताः
वृत्ताक्षाः पिङ्गलाश्चैव महाकाया महोदराः
आकर्णा हारितस्याश्च मुञ्जधूम्रोर्ध्वमूर्धजाः
ताम्रास्या लंबजिह्वोष्ठा लंबभ्रूस्थूलनासिकाः
महाघोरस्वराश्चैव विकटोद्बद्धपिण्डिकाः
दारुणाभिजनाः क्रूराः प्रायशः क्लिष्टकर्मिणः
विचित्राभरणाश्चित्रमाल्यगन्धानुलेपनाः