श्येन्यनन्तं विजज्ञे तु पुत्रपौत्रं द्विजोत्तमाः
इरा विजज्ञे कन्या वै तिस्रः कमललोजनाः
लता चैवालता चैति वीरुधा चैति तत्र या
पुष्पैः फलग्रहैर्वृक्षानलता समसूयत
वीरुधस्तदपत्यं हि वंशश्चात्र समाप्यते
तेषां पुत्राश्च पौत्राश्च यैरिदं संततं जगत्
मारीचो वः प्रजासर्गः समासेन प्रकीर्त्तितः
अदितिर्धर्मशीला तु बलशीला दितिस्तथा
गन्धशीला मुनिश्चैव क्रोधाध्यायनशीलिनी
क्रोधशीला तथा कदूः क्रोधा च शुचिशीलिनी
इरानुग्रहशीला तु ह्यनायुर्भक्षणे रता
धर्मतः शीलतो बुद्ध्या क्षमया बलरूपतः
मातुस्तुल्याभिजाताश्च कश्यपस्यात्मजाः प्रभोः
पिशाचाः पशवश्चैव मृगाः पतगवीरुधः
मनुष्यप्रकृतीस्तस्माद्देवादींश्च विजानते
मन्वन्तरेषु सर्वेषु तस्माच्छ्रेष्ठास्तु मानुषाः
ततोर्ऽवाक्स्रोतसस्ते वै उत्पद्यन्ते सुरासुराः
इत्येष वंशप्रभवः प्रसंख्यातस्तु विस्तरात्
यक्षरक्षः पिशाचानां सुपर्णोरगपक्षिणाम्
कृमिकीटपतङ्गानां क्षुद्राणां जलचारिणाम्
श्रोतव्यश्चैव सततं ग्राह्यश्चैवानसूयतः
अपत्यलाभं लभते च पुष्कलं प्रियं धनं प्रेत्य च शोभनां गतिम्
प्रतिष्ठितासु सर्वासु चरासु स्थावरासु च
ततः क्रमेण राज्यानि आदेष्टुमुपचक्रमे
यज्ञानां तपसां चैव सोमं राज्ये ऽभ्यषेचयत्
भृगूणामधिपं चैव काव्यं राज्ये ऽभ्यषेचयत्
प्रजापतीनां दक्षं च मरुतामथ वासवम्
नारायणं तु साध्यानां रुद्रणां च वृषध्वजम्
अपां च वरुणं राज्ये राज्ञां वैश्रवणं तथा
वैवस्वतं पितॄणां च यमं राज्ये ऽभ्यषेचयत्