कूटदन्तान्महाजिह्वान्विकेशान्विकृताननान्
धन्विनो मुद्गरधरा नसिशूलधरांस्तथा
अन्नादान्पिशितादांश्च सुरापान्सोमपांस्तथा
नक्तञ्चराः खरस्पर्शा घोरास्तेषां निशाचराः
नैषां भार्यास्ति पुत्रा वा सर्वे ते ह्यूर्ध्वरेतसः
भवपारिषदास्ते वै सर्वे भूताः प्रकीर्त्तिताः
मिथुनेन पिशाचांश्च वर्णेन कपिशेन तु
युग्मानि षोडशाद्यानि वर्त्तमानस्तदन्वयः
छगलश्छगला चैव वक्रो वक्रमुखी तथा
विपादश्च विपादी च ज्वाला चाङ्गारकस्तथा
उपवीरश्च वीरा च ह्युलूखल उलूखली
पाणिपात्रः पाणिपात्री पांशुः पांशुमती तथा
बालादः केषणादी च प्रस्कन्दः स्कन्दिका तथा
अजामुखा पक्रमुखाः पूरणः स्कन्दिनस्तथा
उपवीरोलूखलिका अर्कमर्काः कुषण्डिकाः
सूजीमुखोच्छेषणादाः कलान्येतानि षोडश
पिशाचास्ते पिशाच्यस्ताः सकुल्याः संप्रजज्ञिरे
अतस्तेषां पिशाचानां लक्षणानि निबोधत
तिर्य्यगङ्गाः पारुषदाः पिशाचास्ते ह्यजामुखाः
कुषण्डिकपिशाचास्ते प्रियभक्षाः सदामिषाः
ज्ञेया वक्राः पिशाचास्ते वक्रगाः कामरूपिणः
नितुन्दकाः पिशाचास्ते तिलभक्षाः प्रियासृजाः
पिशाचार् कमर्कास्ते वृक्षवासोदनप्रियाः
मुञ्चन्ति पांशुमङ्गेभ्यः पिशाचाः पांशवस्तु ते
उपवीराः पिशाचास्ते श्मशानायतनाः सदा
उलूखलैराभरणा रत्नधाराश्च ते खलाः
हस्त्युष्ट्रस्थूलशिरसो विनतोद्धतपिण्डिकाः
सूक्ष्मास्तु रोमशाः पिङ्गा दृष्टादृष्टाश्चरन्ति ये
आकर्णाद्दारितास्याश्च लंबभ्रूस्थूलनासिकाः
हस्तपादाक्रान्ततुण्डा ह्रस्वकाः क्षितिदृष्टयः