रणचन्द्रं शतमुखं दरीमुखमथापि च
प्रथितं मथितं चैव हरिणं लाङ्गलिं तथा
ऊर्द्ध्वदृष्टिः कृताहारः सुव्रतो विनतो बुधः
क्षेममूर्तिश्च बलवान् राजानः सर्व एव ते
अशक्याः समरेजेतुं देवदानवमानवैः
नाग्निशस्त्रविषैरन्यैर्मृत्युरेषां विधीयते
पाताले च जले वायौ ह्यविनाशिन एव ते
महापद्मसहस्राणि महापद्मशतानि च
नियुतानां सहस्राणि निखर्वाणां तथै व च
अर्बुदानां च लक्षं तु कोटीशतमथापरम्
संख्यातानि कुलीनानां वानराणां तरस्विनाम्
दिव्याभरणवेषाश्च ब्रह्मण्याश्चाहितग्नयः
मुकुटैः कुण्डलैर्हारैः केयूरैः समलङ्कृताः
अस्त्राणां मोचने चापि तथा संहारकर्मणि
समर्था बलिनः शूराः सर्वशस्त्रप्रहारिणः
कुलानां च सहस्राणि दश तेषां महात्मनाम्
नीले श्वेतनगे चैव निषधे गन्धमादने
निलयास्तेषु ते प्रोक्ता विश्वकर्मकृता स्वयम्
सर्वर्तुरमणीयास्ते ह्युद्यानानि च सर्वशः
आलेपनैश्च विविधैर्दिव्यभक्तिकृतैस्तथा
वानरा वानरीभिस्ते दिव्याभरणभूषिताः
क्रियामयाः समुदिता दिवि देवगणा इव
धार्मिकाश्च वरोत्सिक्ता युद्धशैण्डा महाबलाः
अम्लानिनः सत्यसंधा नानार्थे बहुजल्पिनः
वनालङ्कारभूतो हि सृष्टा वै ब्रह्मणा स्वयम्
कपीनामवतारो ऽयं सर्वपापविनाशनः
तदेव कीर्तयिष्यामि तच्छृणुध्वमतन्द्रिताः
व्याघ्रस्य भ्रातरः पञ्च स्वसारश्च तथास्य वै
प्रतिपादिता स्वयं भ्रात्रा भातृदारास्तथैव च
शरभस्यापि विद्धांसो भ्रातरो वीर्यसंमताः