आहृत्यः शोभवत्यश्च वेगवत्यस्तथैव च
वर्हयश्चामृताश्चैव मुदाश्च मृगवो रुचः
ब्रह्मणो मानसाहृत्यः शोभवत्यो मरुत्सुताः
युवत्यश्च तथा सूर्यरश्मिजाताः सुशोभनाः
यज्ञोत्पन्ना स्रुचो नाम कुशवत्यां च बर्हयः
वायूत्पनाना मुदा नाम भूमिजा मृगवस्तथा
शोभयन्त्यश्च कामस्य गणाः प्रोक्ताश्चतुर्दश
देवतानामृषीणां च पत्न्यश्च मातरश्च ह
संप्रयोगस्तु कामेन माद्यं दिवि हरं विना
पर्वतस्तत्र संभूतो नारदश्चैव तावुभौ
देवर्षिभ्यस्तयोर्जन्म यस्मान्नारदपर्वतौ
विनतायाश्च पुत्रौ द्वौ अरुणौ गरुडश्च ह
व्यवहार्याणि सर्वाणि ऋजुसन्निहितानि च
अनेकशिरसां तेषां खेचराणां महात्मनाम्
तेषां प्रधाना नागानां शेषवासुकितक्षकाः
ऐरावतो महापद्मः कंबलाश्वतरावुभौ
महाकर्णमहानीलौ धृतराष्ट्रबलाहकौ
सूनामुखो दधिमुखः कालियश्चालिपिण्डकः
प्रह्रादस्तु ब्रह्मणाश्च गन्धर्वो ऽथ मणिस्थकः
काद्रवेयाः समाख्याताः खशायास्तु निबोधत
श्रेष्ठं पश्चिमसंध्यायां पूर्वस्यां च कनीयसम्
चतुर्भुजं चतुष्पादं किञ्चित्स्पन्दं द्विधागतिम्
स्वच्छशीर्षं महाकर्णं मुञ्जकेशं महाबलम्
रक्तपिङ्गाक्षपादं च स्थूलभ्रूदीर्घनासिकम्
एवंविधं खशापुत्रं जज्ञे ऽसावतिभीषणम्
त्रिशीर्षं च त्रिपादं च त्रिहस्तं कृष्णलोचनम्
ह्रस्वकायं प्रबाहुं च महाकाय महारवम्
स्थूलौष्ठमष्टदंष्ट्र च जिह्मास्यं शङ्कुकर्णकम्
महास्कन्धं महोरस्कं पृथुघोणं कृशोदरम्
एवंविधं कुमारं सा कनिष्ठं समसूयत