मन्वन्तरस्य संख्या तु मानुषेण निबोधत
त्रिंशत्कोट्यस्तु संपूर्णा संख्याताः संख्याया द्विजैः
विंशतिश्च सहस्रामि कालो ऽयं साधिकं विना
वर्षाग्रेणापि दिव्येन प्रवक्ष्याम्युत्तरं मनोः
द्विपञ्चाशत्तथान्यानि सहस्राण्यधिकानि तु
पूर्णं युगसहस्रं स्यात्तदहर्ब्रह्मणः स्मृतम्
ब्रह्माणामग्रतः कृत्वा सह देवर्षिदानवैः
स स्रष्टा सर्व भूतानां कल्पादिषु पुनः पुनः
सर्वमन्वन्तराणां हि प्रतिसंधिं निबोधत
कृतत्रेतादिसंयुक्तं चतुर्युगमिति स्मृतम्
मनोरेतमधीकारं प्रोवाच भगवान्प्रभुः
अतीतानागतानां वै वर्त्तिमानेन कीर्त्तितम्
प्रतिसंधिं तु वक्ष्यामि तस्य चैवापरस्य च
अवश्यभाविनार्थेन यथावद्विनिवर्त्तते
सप्तर्षयश्च देवाश्च पितरो मनवस्तथा
क्षीणे ऽधिकारे संविग्ना बुद्ध्वा पर्ययमात्मनः
ततो मन्वन्तरे तस्मिन्प्रक्षीणे देवतास्तु ताः
उत्पद्यन्ते भविष्यन्तो ये वै मन्वन्तरेश्वराः
मन्वन्तरे तु संपूर्णे तद्वदन्ते कलौ युगे
यथा कृतस्य संतानः कलिपूर्वः स्मृतो बुधैः
क्षीणे मन्वन्तरे पूर्वे प्रवृत्ते चापरे पुनः
सप्तर्षयो मनुश्चैव कालापेक्षास्तु ये स्थिताः
मन्वन्तरोत्सवस्यार्थे संतत्यर्थे च सर्वदा
द्वन्द्वेषु संप्रवृत्तेषु उत्पन्नास्वौषधीषु च
वार्त्तायां संप्रवृत्तायां धर्मे चैवोपसंस्थिते
अग्रामनगरे चैव वर्णाश्रमविवर्जिते
सप्तर्षयो मनुश्चैव संतानार्थं व्यवस्थिताः
उत्पद्यन्ते हि पूर्वेषां निधनेष्विह पूर्ववत्
सर्पा भूतपिशाचाश्च गन्धर्वा यक्षराक्षसाः
सप्तर्षयो मनुश्चव ह्यादौ मन्वन्तरस्य हि