परस्पर निमित्तेन कोपेनाकस्मिकेन तु
गङ्गायमुनयोर्मध्ये निष्ठां प्राप्तः सहानुगः
उत्साद्य पार्थिवान्सर्वान्मलेच्छांश्चैव सहस्रशः
स्थितास्वल्पावशिष्टासु प्रजास्विह क्वचित्क्वचित्
उपहिसंति चान्योन्यं पोथयन्तः परस्परम्
प्रजास्ता वै ततः सर्वाः परस्परभयार्द्दिताः
स्वान्प्रणाननपेक्षन्तो निष्कारणसुदुःखिताः
निर्मर्यादा निराक्रन्दा निःस्नेहा निरपत्रपाः
हित्वा पुत्रांश्च दारांश्च विषादव्याकुलेद्रियाः
प्रत्यन्तांस्ता निषेवन्ते हित्वा जनपदान्स्वकान्
मांसैर्मूलफलैश्चैव वर्तयन्तः सुदुःखिताः
एतां काष्ठामनुप्राप्ता अल्पशेषाः प्रजास्ततः
विचारणा तु निर्वेदात्साम्यावस्था विचारणात्
तासूपशमयुक्तासु कलिशिष्टासु वै स्वयम्
चित्तसंमोहनं कृत्वा तासां वै सुप्तमत्तवत्
प्रवृत्ते तु ततस्तस्मिन्पूते कृतयुगे तु वै
तिष्ठन्ति चेह ये सिद्धा अदृष्टा विचरन्ति च
ब्रह्मक्षत्रविशः शूद्रा बीजार्थं ये स्मृता इह
तेषां सप्तर्षयो धर्मं कथयन्तीतरेषु च
ततस्तेषु क्रियावत्सु वर्तन्ते वै प्रजाः कृते
केचिद्धर्मव्यवस्थार्थं तिष्ठन्तीहायुगक्षयात्
यथा दावप्रदग्धेषु तृणेष्विह तपेन तु
तथा कार्तयुगानां तु कलिजष्विह संभवः
वर्त्तते ह्यव्यवच्छेदाद्यावन्मन्वन्तरक्षयः
युगेष्वेतानि हीयन्ते त्रित्रिपादाः क्रमेण च
इत्येष प्रतिसंधिर्यः कीर्त्तितस्तु मया द्विजाः
एषा चतुर्युगावृत्तिरासहस्रद्गुणीकृता
अत्रार्जवं जडीभावो भूतानामायुगक्षयात्
एषा चतुर्युगानां च गुणिता ह्येकसप्ततिः
चतुर्युगे यथैकस्मिन्भवतीह यथा तु यत्