पतङ्गैः पतगैरश्वैर्भ्रममाणो दिवस्पतिः
वामदक्षिणतो युक्ता दश तेन चरन्त्यसौ
ह्रासवृद्धी तथैवास्य रश्मीनां सूर्यवत्स्मृते
अपां गर्णात्समुत्पन्नो रथः साश्वः ससारथिः
दशभिस्तु कृशैर्दिव्यैरसंगैस्तैर्मनोजवैः
संगृहीतरथे तस्मिञ्श्वेतश्चक्षुःश्रवाश्च वै
यजुश्चण्डमनाश्चैव वृषो वाजी नरो हयः
इत्येते नामभिः सर्वे दश चन्द्रमसो हयाः
देवैः परिवृतः सोमः पितृभिश्चैव गच्छति
आपूर्यते परस्यान्ते सततं दिवसक्रमात्
क्षीणं पञ्चदशाहं तु रश्मिनैकेन भास्करः
सुषुम्णाप्यायमानस्य शुक्ला वर्द्धन्ति वै कलाः
इत्येवं सूर्यवीर्येण चन्द्रश्चाप्यायितस्ततः
एवमाप्यायितः सोमः शुक्ल पक्षे दिनक्रमात्
अपां सारमयस्येन्दो रसमात्रात्मकस्य तु
संभृतं त्वर्द्धमासेन ह्यमृतं सूर्यतेजसा
एकां रात्रिं सुरैः सर्वैः पितृभिः सर्षिभिः सह
प्रक्षीयन्ते पिदृदेवैः पीयमानाः कलाः क्रमात्
त्रयश्च त्रिसहस्राश्च देवाः सोमं पिबन्ति वै
क्षीयन्ति तस्माच्छुक्लाश्च कृष्णा आप्याययन्ति च
पीत्वार्द्ध मासं गच्छन्ति चामावास्यां सुरोत्तमाः
ततः पञ्चदशेकाले किञ्चिच्छिष्टे कलात्मके
पिबन्ति द्विलवं कालं शिष्टास्तस्य कलास्तु याः
तां स्वधां मासतृप्त्यै च पीत्वा गच्छन्ति ते ऽमृतम्
कृष्णपक्षे सुरैस्तद्वत्पीयते वै सुधामयः
काव्यश्चैव तु ये प्रोक्ताः पितरः सर्व एव ते
सौम्यास्तु ऋतुवो ज्ञेया मासा बर्हिषदः स्मृताः
पितृभिः पीयमानस्य पञ्चदश्यां कला तु वै
अमावास्यां तदा तस्य तत आपूर्यते परः
एवं सूर्यनिमित्तैष क्षयोवृद्धिर्निशाकरे