इत्येते निवसंतीह द्वौ द्वौ मासौ दिवाकरे
ग्रामण्यश्च तथा यक्षा यातुधानाश्च मुख्यशः
भूतानां चशुभं कर्म व्यपोहन्ति प्रकीर्त्तिताः
दुरितं सुप्रचाराणां व्यपोहन्ति क्वचि त्क्वचित्
वर्षन्तश्च तपन्तश्च ह्लादयन्तश्च वै प्रजाः
स्थानाभिमानिनामेतत्स्थानं मन्वन्तरेषु वै
चतुर्दशसु सर्वेषु गणा मन्वन्तरेष्विह
गच्छत्यसावृतुवशात्परिवृत्तरश्मिर्देवान् पितॄ#ंश्च मनुजांश्च हि तर्पयन्वै
शुक्ले तु पूर्णं दिवसक्रमेण तं कृष्णपक्षे विबुधाः पिबन्ति
सुधामृतं तत्पितरः पिबन्ति देवाश्च सौम्याश्च तथैव काव्याः
वृष्ट्याभिवृद्धाभिरथौषधीभिर्मर्त्याः क्षुधं त्वन्नपानैर्जयन्ति
अन्नेन शश्वच्च दधाति मर्त्यान्सुर्यस्तपंस्तान्सुबिभर्त्ति गोभिः
विसर्गकाले विसृजंश्च ताः पुनर्बिभर्त्ति शश्वत्सविता चराचरम्
ततः प्रमुञ्चत्यपि तास्त्वसौ हरिः समूह्यमानो हरिभिस्तुरङ्गमैः
भद्रैस्तैरक्रमैरश्वैः स्पन्दने वैदिकक्षयः
सप्तद्वीपसमुद्रान्तां सप्तभिः सप्तभिर्हयैः
कामरूपैः सकृद्युक्तैर्वामतस्तैर्मनोजवैः
त्र्यशीतिमण्डलशतं भ्रमन्त्यब्देन ते हयाः
कल्पादौ संप्र युक्तास्ते वहन्त्याभूतसंप्लवात्
वचोभिरग्र्यैर्ग्रथितैः स्तूयमानो महर्षिभिः
पतङ्गैः पतगैरश्वैर्भ्रममाणो दिवस्पतिः
वामदक्षिणतो युक्ता दश तेन चरन्त्यसौ
ह्रासवृद्धी तथैवास्य रश्मीनां सूर्यवत्स्मृते
अपां गर्णात्समुत्पन्नो रथः साश्वः ससारथिः
दशभिस्तु कृशैर्दिव्यैरसंगैस्तैर्मनोजवैः
संगृहीतरथे तस्मिञ्श्वेतश्चक्षुःश्रवाश्च वै
यजुश्चण्डमनाश्चैव वृषो वाजी नरो हयः
इत्येते नामभिः सर्वे दश चन्द्रमसो हयाः
देवैः परिवृतः सोमः पितृभिश्चैव गच्छति
आपूर्यते परस्यान्ते सततं दिवसक्रमात्