तस्यापरेण सुमहाञ्जलधारो महागिरिः
ततो वर्षं प्रभवति वर्षाकाले प्रजास्विह
रेवती दिवि नक्षत्रं पितामहकृतो विधिः
तस्माच्छ्यामत्वमापन्नाः प्रजाः पूर्वमिमाः किल
तस्यापरे चांबिकेयो दुर्गशैलो महागिरिः
केसरी केसरयुतो यतो वायुः प्रजापतिः
द्वितीयं जलधारस्य सुकुमारमिति स्मृतम्
अस्तस्यापि शुभं वर्षं विज्ञेयं कुसुमोत्तरम्
द्वीपस्य परिमाणं तु ह्रस्वदीर्घत्वमेव च
शाको नाम महोत्सेधस्तस्य पूज्या महानुगाः
नद्यश्चापि महापुण्या गङ्गाः सप्तविधास्तथा
इक्षुश्च वेणुका चैव गभस्तिः सप्तमी तथा
सहस्रशः समाख्याता यतो वर्षति वासवः
शक्यं वै परिसंख्यातुं पुण्यास्ताः सरिदुत्तमाः
शांशपायनविस्तीर्णो द्वीपो ऽसौ चक्रसंस्थितः
सर्वधातुविचित्रैश्च मणिविद्रुमभूषितैः
वृक्षैः पुष्पफलोपेतैः समन्ताद्धनधान्यवान्
शाकद्वीपस्य विस्तारात्समेन तु समंन्ततः
वर्णाश्रमसमाकीर्णा देशास्ते सप्त वै स्मृताः
धर्मस्य चाव्यभीचारादेकान्तसुखिताः प्रजाः
विपर्ययो न तेष्वस्ति कालात्स्वाभाविकं परम्
स्वधर्मेणैव धर्म ज्ञास्ते रक्षन्ति परस्परम्
एतावदेव श्रोतव्यं शाकद्वीपनिवासिनाम्
पुष्करेण तु द्वीपेन वृतः क्षीरोदको बहिः
पुष्करे पर्वतः श्रीमानेक एव महाशिलः
द्वीपस्य तस्य पूर्वर्द्धे चित्रसानुः स्थितो महान्
उर्द्धं चैव चतुस्त्रिंशत्सहस्राणि महीतलात्
स्थितो वेलासमीपे तु नवचन्द्र इवोदितः
तावदेव च विस्तीर्णः सर्वतः परिमण्डलः
एक एव महासारः सन्निवेशो द्विधा कृतः