कामराजान्तमन्त्रान्ते श्रीबीजेन समन्वितः
इत्थं रहस्यमाख्यातं गोपनीयं प्रयत्नतः
सर्वेषा मपि मन्त्राणां विद्यैषा प्राणरूपिणी
संस्मृता पापहरणी जरामृत्युविनाशिनी
स्तुता विघ्नौघशमिनी ध्याता सर्वार्थसिद्धिदा
भजेद्यः परमेशानीमभीष्टफलमाप्नुयात्
पूजयेद्धवलैः पुष्पैर्ब्रह्मचर्ययुतो नरः
संकल्पधवलैर्वापि पूजयेत्परमेश्वरीम्
षोडशाक्षरविद्यां तामर्चयेच्छुद्धमानसः
अनुलोमविलोमेन प्रजपन्मात्रिकाक्षरैः
मनसोपांशुना वापि निगदेनापि तापस
एकलक्षजपेनैव महापापैः प्रमुच्यते
पापानि नाशयत्येव साधकस्य परा कला
क्रमात्षोडशलक्षेण देवीसांनिध्यमाप्नुयात्
होमो ब्राह्मणभुक्तिश्च पुरश्चरणमुच्यते
मन्त्रान्ते पूजयेद्देवीं जपकाले यथोचितम्
तद्दशांशं ब्राह्मणानां भोजनं विन्ध्यमर्दन
तत्संख्याद्विगुणं जप्त्वा पुरश्चर्यां समापयेत्
पश्चाद्वश्यादिकर्माणि कुर्वन्सिद्धिमवाप्स्यति
सर्वमात्मानमरुणं साध्यमप्यरुणीकृतम्
वल्लभः सर्वलोकानां वशयेन्नात्रसंशयः
शतमष्टोत्तरं जप्त्वा तिलकं कारयेद् बुधः
अर्धेन च शरीरेण स वशं याति दासवत्
सद्य आकृष्यते सा तु विमूढहृदया सती
सुरूपां च सशृङ्गारवेषाभरणमण्डिताम्
जन्मनाममहाविद्यामङ्कुशान्तर्विदर्भितम्
तदाशाभिमुखो भूत्वा त्रिपुरीकृतविग्रहः
संयोज्य दहनागारे चन्द्रसूर्यप्रभाकुले
प्रज्वलन्मदनोन्मेषप्रस्फुरज्जघनस्थलाम्
दूरीकृतसुचारित्रां विशालनयनाम्बुजाम्