मुद्रेश्वरीचर्चितराजतन्त्रे मुद्राप्रिये देवि नमोनमस्ते
क्रोडानने पालितसैन्यचक्रे क्रोडीकृताशेषभये नमस्ते
षट्चक्रसंस्थे च षडूर्मियुक्ते षड्भावरूपे ललिते नमस्ते
कामप्रदे कामिनि कामशंभोः काम्ये कलानामधिपे नमस्ते
देदीप्यमाने दयया सनाथे देवाधिदेवप्रमदे नमस्ते
सभ्ये सदेकाल यपादपूज्ये सवित्रि लोकस्य नमोनमस्ते
ब्रह्मामृतस्रोतसि राजहंसिब्रह्मेश्वरि श्रीललिते नमस्ते
नित्ये कलाषोडशकेन नामाकर्षिण्यधीशि प्रमथेन सेव्ये
अभव्यहन्त्र्यक्षरराशिरूपे हतारिवर्गे ललिते नमस्ते
आत्मानमाबिभ्रति विभ्रमाढ्ये शुभ्राश्रये शुभ्रपदे नमस्ते
सर्वाधिके सर्वगते समस्तसिद्धिप्रदे श्रीललिते नमस्ते
सर्वामराकाङ्क्षितपूरयित्रि सर्वस्य लोकस्य सवित्रि पाहि
बलाहकश्यामकचे वचो ऽब्धे वरप्रदे सुंदरि पाहि विश्वम्
अत्युग्रतेजोज्ज्वलितांबुराशे प्रसेव्यमाने परितो नमस्ते
कथाविशेषीकृतदैत्यसैन्ये कामेशयान्ते कमले नमस्ते
बृहत्कुचंभोजविलोलहारे बृहत्प्रभावे ललिते नमस्ते
कल्पावसानोत्थित कालिरूपे कामप्रदे कल्पलते नमस्ते
सारस्य सारस्य सदैकभूमे समस्तविद्येश्वरि संनतिस्ते
भण्डासुराद्याः समरे प्रचण्डा हता जगत्कण्टकतां प्रयाताः
त्वया समस्तं भुवनं सहर्षं सुजीवितं सुंदरि सभ्यलभ्ये
स्थाण्वाश्रमे कॢप्ततया विरक्तः सतीवियोगेन विरस्तभोगः
एवं स्मरं प्रेरितवन्त एव तस्यान्तिकं घोर तपःस्थितस्य
भस्मावशेषो मदनस्ततो ऽभूत्ततो हि भण्डासुर एष जातः
अथास्मदर्थे त्वतनुस्सजातस्त्वं कामसंजीवनमाशुकुर्याः
पुनस्त्वदुत्पादितकामसंगाद्भविष्यति श्रीललिते सनाथा
चिरं कृतात्यन्तमहासपर्या तां पार्वतीं द्राक्परिणेष्यतीशः
तेनैव वीरेण रणे निरस्य स तारको नाम सुरारिराजः
श्रीकण्ठपुत्रैण रणे हतश्चेत्प्राणप्रतिष्ठैव तदा भवेन्नः
उत्पाद्यरत्या विधवात्वदुःखमपाकुरु व्याकुलकुन्तलायाः
नमस्करोति त्रिपुराभिधाने तदत्र कारुण्यकलां विधेहि