चतुर्थदिनशर्वर्यां विभातायां हयानन
पश्चादाचरितं कर्म निहते भण्डदानवे
मुहुराह्लादयामास लोचनैरमृताप्लुतैः
जहुर्युद्धपरिश्रान्तिं शक्तयः प्रीतिमानसाः
सर्वे ऽपि सेवितुं प्राप्ता ब्रह्मविष्णुपुरोगमाः
आदित्या वसवो रुद्रा मरुतः साध्यदेवताः
प्रह्लादाद्या महादैत्याः सर्वे ऽप्यण्डनिवासिनः
आगत्य तुष्टुवुः प्रीत्या सिंहासनमहेश्वरीम्
नमोनमो भण्डमहासुरघ्ने नमो ऽस्तु कामेश्वरि वामकेशि
चित्राम्बरे चित्रजगत्प्रसूते चित्राख्यनित्ये सुखदे नमस्ते
मुद्रेश्वरीचर्चितराजतन्त्रे मुद्राप्रिये देवि नमोनमस्ते
क्रोडानने पालितसैन्यचक्रे क्रोडीकृताशेषभये नमस्ते
षट्चक्रसंस्थे च षडूर्मियुक्ते षड्भावरूपे ललिते नमस्ते
कामप्रदे कामिनि कामशंभोः काम्ये कलानामधिपे नमस्ते
देदीप्यमाने दयया सनाथे देवाधिदेवप्रमदे नमस्ते
सभ्ये सदेकाल यपादपूज्ये सवित्रि लोकस्य नमोनमस्ते
ब्रह्मामृतस्रोतसि राजहंसिब्रह्मेश्वरि श्रीललिते नमस्ते
नित्ये कलाषोडशकेन नामाकर्षिण्यधीशि प्रमथेन सेव्ये
अभव्यहन्त्र्यक्षरराशिरूपे हतारिवर्गे ललिते नमस्ते
आत्मानमाबिभ्रति विभ्रमाढ्ये शुभ्राश्रये शुभ्रपदे नमस्ते
सर्वाधिके सर्वगते समस्तसिद्धिप्रदे श्रीललिते नमस्ते
सर्वामराकाङ्क्षितपूरयित्रि सर्वस्य लोकस्य सवित्रि पाहि
बलाहकश्यामकचे वचो ऽब्धे वरप्रदे सुंदरि पाहि विश्वम्
अत्युग्रतेजोज्ज्वलितांबुराशे प्रसेव्यमाने परितो नमस्ते
कथाविशेषीकृतदैत्यसैन्ये कामेशयान्ते कमले नमस्ते
बृहत्कुचंभोजविलोलहारे बृहत्प्रभावे ललिते नमस्ते
कल्पावसानोत्थित कालिरूपे कामप्रदे कल्पलते नमस्ते
सारस्य सारस्य सदैकभूमे समस्तविद्येश्वरि संनतिस्ते
भण्डासुराद्याः समरे प्रचण्डा हता जगत्कण्टकतां प्रयाताः
त्वया समस्तं भुवनं सहर्षं सुजीवितं सुंदरि सभ्यलभ्ये