त्वदीयरथपर्वस्थो यो ऽस्ति शीतमहार्णवः
नाल्पैः पानीयपानाद्यैरेतासां तर्षसंक्षयः
सर्वतर्षप्रशमनं महाबलविवर्धनम्
आजुहाव सुधासिंधुमाज्ञां चक्रेश्वरी रणे
स मदालसरक्ताक्षो हेमाभः स्रग्विभूषितः
प्रणम्य दण्डनाथां तां तदाज्ञापरिपारकः
क्वचित्तापिच्छवच्छ्यामं क्वचिच्च धवलद्युतिम्
ववर्ष सिंधुराजो ऽयं वायुना बहुलीकृतः
निषिच्यमानो मध्ये ऽब्धिः शक्तिसैन्ये पपात ह
दुर्बलः प्रबलश्च स्यात्तद्ववर्ष सुरांबुधिः
प्रपिबन्त्यः पिपासार्तैर्मुखैः शक्तय उत्थिताः
तथा सैन्यस्य परितो महाप्राकारमण्डलम्
चकार विस्मयकरी कदंबवनवासिनी
अथ ताः शक्तयो भूरि पिबन्ति स्म रणान्तरे
यस्या यस्या मनःप्रीती रुचिः स्वादो यथायथा
संततं मध्यधाराभिः प्रववर्ष सुरांबुधिः
हैताली लाङ्गलेया च तालजातास्तथा सुराः
सुस्वादुसौरभाद्याश्च शुभगन्धसुखप्रदाः
कटुकाश्च कषायाश्च मधुरास्तिक्ततास्पृशः
ईषदम्लाश्च कट्वम्ला मधुराम्लास्तथा पराः
रणभ्रमहरा शीता लघ्व्यस्तद्वत्कवोष्ठकाः
नानाविधाः सुराधारा ववर्ष मदिरार्णवः
ऐरावतकर प्रख्यां सुराधारां मुदा पपौ
शक्तयः प्रपपुः सीधु मुदा मीलितलोचनाः
आगतस्तर्पयित्वा तु दिव्यरूपं समास्थितः
स्निग्धगंभीरघोषेण वाक्यं चेदमुवाच ताम्
मया संतर्पिता मुग्धरूपा शक्तिवरूथिनी
नृत्यन्तीनां पुरः काश्चित्करतालं वितन्वते
पतन्त्यन्योन्यमङ्गेषु काश्चिदानन्दमन्थराः
काश्चिदुत्थाय संनद्धा घूर्णयन्ति निरायुधाः