चञ्चरीककुलैरग्रे गीयमानमहोदयाः
सदा रत्नाकरानेकहेलया पातुमुद्यताः
आमोदश्च प्रमोदश्च मुमुखो दुर्मुखस्तथा
ते सप्तकोटिसंख्यानां हेरंबाणामधीश्वराः
अग्निप्राकारवलयाद्विनिर्गत्य गजाननाः
पुनः प्रचण्डफूत्कारबधिरीकृतविष्टपाः
अच्छिदन्निशितैर्बाणैर्गणनाथः स दानवान्
युद्धमुद्धतहुङ्कारभिन्नकार्मुकनिःस्वनम्
विशुक्रो युधि बिभ्राणः समयुध्यत तेन सः
दैत्यसप्तिखुरक्रीडत्कुद्दालीकूटनिस्वनैः
हेषया च हयश्रेण्या रथचक्रस्वनैरपि
धनुषां गुणनिस्स्वानैश्चक्रचीत्करणैरपि
अट्टहासैर्महेन्द्राणां सिंहनादैश्चभूरिशः
त्रिंशदक्षौहिणी सेना विशुक्रस्य दुरात्मनः
दन्तैर्मर्म विभिन्दन्तो विष्टंयतश्च शुण्डया
नासाश्वासैश्च परुषैर्विक्षिपन्तः पताकिनीम्
पिंषन्तश्च पदाघातैः पीनैर्घ्नन्तस्तथोदरैः
शङ्खस्वनेन महता त्रासयन्तो वरूथिनीम्
धूलीशेषं समस्तं तत्सैन्यं चक्रुर्महोद्यताः
प्रेषयामास देवस्य गजासुर मसौ पुनः
सप्ताक्षौहिणियुक्तेन युयुधे स गणेश्वरः
वर्धमानं च तद्वीर्यं विशुक्रः प्रपलायितः
सप्ताक्षौहिणिकायुक्तं गजासुरममर्दयत्
ललितान्तिकमापेदे महागमपतिर्मृधात्
ललिता चाति मुदिता बभूवास्य पराक्रमैः
सर्वदैवतपूजायाः पूर्वपूज्यत्वमुत्तमम्
सेनानां कदनं श्रुत्वा सन्तप्तो बहुचिन्तया
प्रेषयामास युद्धाय भण्डदैत्यः सहोदरौ
विषङ्गश्च विशुक्रश्च महोद्यम मवापनुः
विशुक्रमनुवव्राज सेना त्रैलोक्यकम्पिनी