अयं कुशलधीमार्गोनीतिरेषा सनातनी
परचक्राक्रमः कार्यो जिगीषद्भिर्महाजनैः
ज्वालामालिनिकां नित्यामाहूयेदमुवाच ह
त्वया विधीयतां रक्षा बलस्यास्य महीयसः
त्रिंशद्योजनमुन्नद्धं ज्वालाकारत्वमाव्रज
वह्निज्वालात्वमापन्ना संरक्ष सकलं बलम्
महेन्द्रोत्तरभूभागं चलितुं चक्र उद्यमम्
चतुर्दशीतिथिमयी तथेति प्रणनाम ताम्
कुण्डलीकृत्य जज्वालशालरूपेण सा पुनः
बभासे दण्डनाथाया मन्त्रिनाथचमूरपि
विशङ्कटोदरं सालं प्रविवेश गतक्लमा
वामपक्षे रथं स्वीयं दक्षिणे श्यामलारथम्
एवं संवेश्य परितश्चक्रराजरथस्य च
ज्वलद्दण्डायुधोदग्रां स्तम्भिनीं नाम देवताम्
पूषण्युदितभूयिष्ठे पुनर्युद्धमुपाश्रयत्
अग्निप्राकारकद्वारान्निर्जगाम् महारवा
भूयः संज्वरमापन्नः प्रचण्डो भण्डदानवः
विषङ्गेण विशुक्रेणासममात्मसुतैरपि
चतुर्बाहुमुखान्पुत्रांश्चतुर्जलधिसन्निभान्
प्रेषयामास युद्धाय भण्डश्चण्डक्रुधा ज्वलन्
तेषां नामानि वक्ष्यामि समाकर्णय कुम्भज
वज्रघोषश्चोर्ध्वकेशो महाकायो महाहनुः
लडुनः पट्टसेनश्च पुराजित्पूर्वमारकः
अतिमायो बृहन्माय उपमायश्च वीर्यवान्
पितुः सदृशदोर्वीर्याः पितुः सदृशविग्रहाः
सगौरवमिदं वाक्यं बभाषे कुलघातकः
भवतामेव सत्येन जितं विश्वं मया पुरा
कचेषु कर्षणं कोपात्कृतं युष्माभिराहवे
जाग्रत्स्वेव ही युष्मासु कुलभ्रंशो ऽयमागतः
बहुभिः स्वसमानाभिः स्त्रीभिर्युक्ता हिनस्ति नः