मुहुर्जयजयेत्येवं स्तुवाना ललितेश्वरीम्
सप्तर्षयो वशिष्ठाद्या ऋग्यजुः सामरूपिभिः
हविषेव महावह्निशिखामत्यन्तपाविनीम्
तैः स्तूयमाना ललिता राजमाना रथोत्तमे
भण्डासुरं विनिर्जेतुमुद्दण्डैः सह सैनिकैः
महान्तं क्षोभमायाता भण्डासुरपुरालयाः
महेन्द्रपर्वतोपान्ते महार्णवतटे पुरम्
विषङ्गाग्रजदैत्यस्य सदावासः किलाभवत्
वित्रेसुर सुराः सर्वे श्रीदेव्यागमसंभ्रमात्
धूमैरिवावृतमभूदुत्पातजनितैर्मुहुः
धूर्णमाना पतन्ति स्म महोल्का गगनस्थलात्
मही जज्वाल सकला तत्र शून्यकपत्तने
ध्वजाग्रवर्तिनः कङ्कगृध्राश्चैव बकाः खगाः
क्रव्यादा बहवस्तत्र लोचनैर्नावलोकिताः
सर्वतो दिक्षुदृश्यन्ते केतवस्तु मलीमसाः
दैत्यस्त्रीणां च विभ्रष्टा अकाले भूषणस्रजः
दपणानां वर्मणां च ध्वजानां खड्गसंपदाम्
सौधेषु चन्द्रशालासु केलिवेश्मसु सर्वतः
चतुष्किकास्वलिङ्गेषु प्रग्रीवेषु वलेषु च
स्वस्तिकेषु च सर्वेषु गर्भागारपुटेषु च
वातायनेषु कक्ष्यासु धिष्ण्येषु च खलेषु च
अश्रूयन्त महाघोषाः परुषा भूतभाषिताः
आराविषु करोटीनां कोटयश्चापतन्भुवि
केशौघकाश्च निष्पेतुः सर्वतो धूमधूसराः
निवेदयामासुरमी भण्डाय प्रथितौजसे
असंजातधृतिभ्रंशो मन्त्र स्थानमुपागमत्
अध्यासामास दैत्येन्द्रः सिंहासनमनुत्तमम्
दीपयन्नखिलाशान्तानद्युतद्दानवेश्वरः
तुङ्गसिंहासनस्थं तं सिषेवाते तदानुजै
त्रैलोक्यकण्टकीभूतभुजदण्डभयङ्करौ