चण्डोच्चण्ड इति ख्यातश्चतुर्हस्तस्त्रिलोचनः
सदा संसेवते देवीं पश्यन्नेव हि पोत्रिणीम्
वार्त्ताल्याद्या अष्ट देव्यो दिक्ष्वष्टासूपविश्रुताः
अष्टनागस्फुरद्भूषा अनष्टबलतेजसः
सेवन्ते ललितां देव्यो दण्डनाथामहर्निशम्
वार्ताली चैव वाराहीसा वाराहमुखी परा
स्तंभिनीति रिपुक्षोभस्तंभनोच्चाटनक्षमाः
दण्डनाथोपवाह्यस्तु कासरो धूसराकृतिः
खड्गवन्निष्ठुरैर्लोमजातैः संवृतविग्रहः
नीलाञ्जनाचलप्रख्यो विकटोन्नतरुष्टभूः
प्रभूतोष्मलनिश्वासप्रसराकंपितांबुधिः
वर्त्तते खुरविक्षिप्तपुष्कलावर्तवारिदः
इन्द्रादयो ऽनेकभेदा दिशामष्टकदेवताः
इन्द्रश्चाप्सरसश्चैव स चतुष्षष्टिकोटयः
विश्वकर्मा मयश्चैव मातरश्च बलोन्नताः
क्रन्दञ्चिरक्षसां नाथा राक्षसा बहवस्तथा
विश्वावसुप्रभृतयो विख्यातास्तत्पुरोगमाः
विद्याधराः किन्नराश्च मारुतेश्वर एव च
तुंबुरुर्नारदो यक्षः सोमोयक्षेश्वरस्तथा
ईशानश्च जगच्चक्रभक्षकः शूलभीषणः
धन्वन्तरिश्च भगवानथान्ये गणनायकाः
अनन्तो वासुकिस्तक्षः कर्केटः पद्म एव च
एते नागेश्वराश्चैव नागकोटिभिरावृताः
पूर्वादिदिशमारभ्य परितः कृतमन्दिराः
आश्रित्य किल वर्तन्ते तदधिष्ठातृदेवताः
तस्यैव पर्वणः प्रान्ते किरिचक्रस्य भास्वतः
पातालतलजंबालबहुला कारकालिमा
भिन्दन्डमरुकध्वानै रोदसीकन्दरोदरम्
क्षेत्रपालः सदा भाति सेवमानः किटीश्वरीम्
यमा रुह्य प्रववृते भण्टासुरबधैषिणी