मन्त्रनाथां पुरस्कृत्य संप्रचेलुः पुरः पुरः
बालार्कवर्णकवचा मदालोलविलोचना
प्रेक्षयन्ती कटाक्षौधौः किञ्चिद्भ्रूवल्लिताण्डवैः
पिच्छत्रिकोणच्छत्रेण बिरुदेन महीयसा
निर्जगाम घनश्यामश्यामला मन्त्रनायिका
तानि षोडशनामानि शृणु कुंभसमुद्भव
मन्त्रिणी सचिवेशी च प्रधानेशी शुकप्रिया
निपप्रिया कदंबेशी कदंबवनवासिनी
तस्य त्रैलोक्यमखिलं हस्ते तिष्ठत्यसंशयम्
तत्रतत्र गताशङ्कं शत्रुसैन्यं पतत्यलम्
शक्तीनामपि चर्चा या सा सर्वत्र जयप्रदा
निर्जगाम धनुर्वेदो वहन्सज्जंशरासनम्
नमस्कृत्य प्रधानेशीमिदमाह स भक्तिमान्
अतस्तव मया साह्यं कर्तव्यं मन्त्रिनायिके
गृहाण जगतामंब दानवानां निबर्हणम्
गृहाण दैत्यनाशाय ममानुग्रहहेतवे
अर्पितांश्चापतूणीराञ्जग्राह प्रियकप्रिया
विस्फारं जनयामास मौर्वीमुद्वाद्य भूरिशः
नाकालयानां च मनोन यनानन्दसंपदा
शुकं वीणां च सहसा वहन्त्यौ परिचेरतुः
धारयन्ती घनश्यामा चकारातिमनोहरम्
कदंबिनीव रुरुचे कदम्बच्छत्रकार्मुका
उल्लसन्दक्षिणे पाणौ विललास शिलीमुखः
तद्वच्छ्यामलशोभाढ्या देव्यो बाणधनुर्धराः
आपूरयन्त्यः ककुभं कलैः किलिकिलारवैः
कलनिक्वणद्वलयमैक्ष्वं धनुर्दधती प्रदीप्तकुसुमेषुपञ्चका
किरती दिशासु वदनस्य कान्तिभिः सृजतीव चन्द्रमयमभ्रमण्डलम्
धवलातपत्रवलयेन भासुरा शशिमण्डलस्य सखितामुपेयुषा
नवचन्द्रिकालहरिकान्तिकन्दलीचतुरेण चामरचतुष्टयेन च
संगीतवाद्यरचनाभिरथामरीणां संस्तूयमानविभवा विशदप्रकाशा