अत्यन्तोत्तुङ्गवर्ष्माणं कविकाविलसन्मुखम्
स्थूलवालधिविक्षेपक्षिप्यमाणपयोधरम्
वादयन्तमिवोच्चण्डैः खुरनिष्ठुरकुट्टनैः
घोषमाणं प्रति मुहुः संदर्शितगतिक्रमम्
भाण्डैर्मनोहरैर्युक्तं घर्घरीजालमण्डितम्
अश्वारूढा महादेवी समारूढा हयं ययौ
हयवल्गां च दधती बहुविक्रमशोभिनी
सञ्चचाल हयारूढा नर्तयन्तीव वाजिनम्
उद्दण्डसिन्धुनिस्वानश्चकार बधिरं जगत्
अन्युद्धतभुजाश्मानः शक्तयः काश्चिदुच्छ्रिताः
खड्गं फलकमादाय पुप्लुवुश्चण्डसक्तयः
निवारयन्त्यो वेत्रिण्यो व्युच्छलन्ति स्मशक्तयः
सिहाङ्काश्चैव बिभ्राणाः शक्तयो व्यचलन्पुरा
स्फुरत्कराः प्रचलिताः शक्तयः काश्चिदाददुः
छत्रैर्गगनमारेजे निःसंख्याशशिमण्डितम्
तिमिरं नुनुदे भूयस्तत्काण्डमणिरोचिषा
तालवृन्ताः शतविधाः क्रोडमुख्या बले ऽचलन्
ज्वलत्केशापिशङ्गाभास्तडिद्भासुरदिङ्मुखाः
प्रचेलुर्दण्डनाथायास्सेना नासीरधाविताः
तत्समानायुधकरास्तत्समानस्ववाहनाः
तमालश्यामलाकाराः कपिलाः क्रूरलोचनाः
अथ श्रीदण्डनाथा च करिचक्ररथोत्तमात्
वज्रघोष इति ख्यातं धूतकेसरमण्डलम्
दंष्ट्राकटकटत्कारबधिरीकृतदिक्तटम्
विबन्तमिव भूचक्रमापातालं निमज्जिभिः
सिंहवाहनमारुह्य व्यचलद्दण्डनायिका
उद्वेगं बहुलं प्राप त्रैलोक्यं सचराचरम्
किं वा मुसलघातेन भूमिं द्वेधा करिष्यति
इति त्रस्तहृदः सर्वे गगने नाकिनां गणाः
मुहुर्द्वादशनामानि कीर्तयन्तो नभस्तले