यथार्हं पूजयित्वा तु प्रेषयामास चांबिका
स्वस्वांशैः शिवयोः सेवामादिपित्रोरकुर्वत
आविर्भावं महादेव्यास्तस्या राज्याभिषेचनम्
जपेद्धनसमृद्धः स्यात्सुधासंमितवाग्भवेत्
यशः प्राप्नोति विपुलं समानोत्तमतामपि
कदाचिन्न भयं तस्य तेजस्वी वीर्यवान्भवेत्
त्रिसंध्यं यो जपेन्नित्यं ध्यात्वा सिंहासनेश्वरीम्
षण्मासान्महतीं लक्ष्मीं प्राप्नुयाज्जापकोत्तमः
त्रैलोक्यकण्टकं भण्डं दैत्यं जेतुं विनिर्ययौ
प्रभूतमर्द्दलध्वानैः पूरयामासुरंबरम्
सेलुकाझल्लरीराङ्घाहुहुकाहुण्डुकाघटाः
यवमध्या मुष्टिमध्या मर्द्दलाडिण्डिमा अपि
उद्धकाश्चैतुहुण्डाश्च निःसाणा बर्बराः परे
दध्वनुः शक्तिसेनाभिराहताः समरोद्यमे
संपत्करी नाम देवी चचाल सह शक्तिभिः
सेविता तरुणादित्यपाटला संपदीश्वरी
रणकोलाहलं नाम सारुरोह मतङ्गजम्
लोलाभिः केतुमालाभिरुल्लिखन्ती धनाधनात्
कण्टको घनसंनाहो रुरुचे वक्षसिस्थितः
कुटिला कालनाथस्य भृकुटीव भयङ्करा
तामन्वगा ययुः कोटिसंख्याकाः कुञ्जरोत्तमाः
अतित्वरितविक्रान्तिरश्वारूढाचलत्पुरः
व्यचरत्खुरकुद्दालविदारितमहीतलम्
टङ्कणाः पर्वतीयाश्च पारसीकास्तथा परे
वाल्मीकयावनोद्भूता गान्धर्वाश्चाथ ये हयाः
विनीताः साधुवोढारो वेगिनः स्थिरचेतसः
लक्षणैर्बहुभिर्युक्ता जितक्रोधा जितश्रमाः
पञ्चधारासु शक्षढ्या विनीताश्च प्लवान्विताः
देवपद्मं देवमणिं देवस्वस्तिकमेव च
वहन्तो वातजवना वाजिनस्तां समन्वयुः