सर्वाभरणसंयुक्तां शृङ्गारैकरसालयाम्
पाशाङ्कुशेक्षुकोदण्डपञ्चबाणलसत्कराम्
प्रणेमुर्मुदितात्मानो भूयोभूयो ऽखिलात्मिकम्
तुष्टुवुश्च महादेवीमंबिकामखिलार्थदाम्
जय कल्याणनिलये जय कामकलात्मिके
जयाखिलसुराराध्ये जय कामेशि मानदे
जय नारायणि परे नन्दिताशेषविष्टपे
जय श्रीविजये देवि विजय श्रीसमृद्धिदे
नमस्तस्यै त्रिजगतां पालयित्र्यै परात्परे
नमः सहस्रशीर्षायै सहस्रमुखलोचने
अणोरणुतरे देवि महतो ऽपि महीयसि
अतलं तु भवेत्पादौ वितलं जानुनी तव
हृदयं तु भुवर्लोकः स्वस्ते मुखमुदाहृतम्
मरुतस्तु तवोच्छ्वासा वाचस्ते श्रुतयो ऽखिलाः
आहारस्ते सदानन्दो वासस्ते हृदये सताम्
शिरोरुहा घनास्ते तु तारकाः कुसुमानि ते
यमाश्च नियमाश्चैव करपादरुहास्तथा
प्राणायामस्तु ते नासा रसना ते सरस्वती
मनस्ते धारणाशक्तिर्हृदयं ते समाधिकः
भूतं भव्यं भविष्यच्च नित्यं च तव विग्रहः
आदौ या तु दयाभूता ससर्ज निखिलाः प्रजाः
हृदयस्थापि लोकानामदृश्या मोहनात्मिका
नमस्तस्यै महादेव्यै सर्वशक्त्यै नमोनमः
पृथिव्यादीनि भूतानि तस्यै देव्यै नमोनमः
दधार स्वयमेवैका तस्यै देव्यै नमोनमः
यस्यामुदेति सविता तस्यै देव्यै नमोनमः
यत्रान्तमेति काले तु तस्यै देव्यै नमोनमः
नमोनमस्ते तमसे हरायै नमोनमो निर्गुणतः शिवायै
नमोनमस्ते ऽखिलरूपतन्त्रे नमोनमस्ते ऽखिलयन्त्ररूपे
नमो ऽस्तु लक्ष्म्यै जगदेकतुष्ट्यै नमोनमः शांभवि सर्वशक्त्यै