एतद्दृष्ट्वा तु दैत्येन्द्रो विषण्मः स्वपुरं ययौ
भयाद्विव्यथिरे देवा विमुक्तसकलक्रियाः
अशक्यः समरे योद्धुमस्माभिरखिलैरपि
कुण्डं योजनविस्तारं सम्यक्कृत्वा तु शोभनम्
यजामः परमां शाक्तिं महामासैर्वयं सुराः
एवमुक्तास्तु ते सर्वेदेवाः सेन्द्रपुरोगमाः
हुतेषु सर्वमांसेषु पादेषु च करेषु च
प्रादुर्बभूव परमन्तेजः पुञ्जो ह्यनुत्तमः
तन्मध्ये तु महादेवीमुदयार्कसमप्रभाम्
सौन्दर्यसारसीमां तामानन्दरससागराम्
सर्वाभरणसंयुक्तां शृङ्गारैकरसालयाम्
पाशाङ्कुशेक्षुकोदण्डपञ्चबाणलसत्कराम्
प्रणेमुर्मुदितात्मानो भूयोभूयो ऽखिलात्मिकम्
तुष्टुवुश्च महादेवीमंबिकामखिलार्थदाम्
जय कल्याणनिलये जय कामकलात्मिके
जयाखिलसुराराध्ये जय कामेशि मानदे
जय नारायणि परे नन्दिताशेषविष्टपे
जय श्रीविजये देवि विजय श्रीसमृद्धिदे
नमस्तस्यै त्रिजगतां पालयित्र्यै परात्परे
नमः सहस्रशीर्षायै सहस्रमुखलोचने
अणोरणुतरे देवि महतो ऽपि महीयसि
अतलं तु भवेत्पादौ वितलं जानुनी तव
हृदयं तु भुवर्लोकः स्वस्ते मुखमुदाहृतम्
मरुतस्तु तवोच्छ्वासा वाचस्ते श्रुतयो ऽखिलाः
आहारस्ते सदानन्दो वासस्ते हृदये सताम्
शिरोरुहा घनास्ते तु तारकाः कुसुमानि ते
यमाश्च नियमाश्चैव करपादरुहास्तथा
प्राणायामस्तु ते नासा रसना ते सरस्वती
मनस्ते धारणाशक्तिर्हृदयं ते समाधिकः
भूतं भव्यं भविष्यच्च नित्यं च तव विग्रहः