पञ्चविंशतितत्त्वानां प्रीतये मथ्यते ऽधुना
तावुभौ पुण्यकर्माणौ न दोषो विद्यते तयोः
सर्वेषामेव पापानां यौगपद्येन नाशनम्
अष्टोत्तरसहस्रं तु जपेत्पञ्चदशाक्षरीम्
सर्वापद्भ्यो विमुच्येत सर्वाभीष्टं च विन्दति
संयोगजस्य पापस्य विशेषं वक्तुमर्हसि
कर्ता प्रधानः सहकृन्निमित्तो ऽनुमतः क्रमात्
क्रमाद्दशांशतो ऽघं स्याच्छुद्धिः पूर्वोक्तमार्गतः
लशुनं च कलिङ्गं च महाकोशातकीं तथा
औदुंबरं च वार्ताकं कतकं बिल्वमल्लिका
पुरग्रामाङ्गवैश्याङ्गवेश्योपायनविक्रयी
वैद्यो वैखानसः शैवो नारीजीवो ऽन्नविक्रयी
क्रमाद्दशगुणान्न्यूनमेषामन्नादने भवेत्
तैरेव दृष्टं तद्भुक्तमुक्तपापं विनिर्दिशेत्
तैलपक्वमदृष्टं च भुञ्जन्पादमघं भवेत्
वेश्यायास्तु त्रिपादं स्यात्तथा दृष्टे तदोदने
तैलाज्यगुडसंयुक्तं पक्वं वैश्यान्न दुष्यति
वैश्यावद्ब्राह्मणी भ्रष्टा तया दृष्टेन किञ्चन
अथवान्तर्जले जप्त्वाद्रुपदां वा त्रिवारकम्
उपोष्य रजनीमेकां ततः पापाद्विशुध्यति
अन्नसूक्तं जपित्वा तु भृगुर्वै वारुणीति च
उपोष्य रजनीमेकां ततः शुद्धो भविष्यति
आपदि ब्राह्मणो ह्येषामन्नं भुक्त्वा न दोषभाक्
सो ऽहंभावेन तद्ध्यात्वा भुक्त्वा दोषैर्न लिप्यते
सो ऽहंभावेन तज्ज्ञानान्न दोषैः प्रविलिप्यते
ध्यात्वा देवीं परां शक्तिं जप्त्वा पञ्चदशाक्षरीम्
नास्यान्नदोषजं किञ्चिन्न दारिद्रयभयं तथा
जपतो मुक्तिरेवास्य सदा सर्वत्र मङ्गलम्
प्रायश्चित्तं तथा तेषां किमन्यच्छ्रोतुमिच्छसि
दुष्कृतं तत्प्रतीकारो भवता सम्यगीरितः