मन्वन्तरेषु देवानामिज्या यत्रैव लौकिकी
सर्वासां देवयोनीनां स्थितिहेतुः स वै स्मृतः
ध्रुवादूर्द्ध्वं महर्लोको यस्मिंस्ते कल्पवासिनः
द्वीकोट्यां तु महर्लोकाज्जनलोको व्यवस्थितः
यत्र ते ब्रह्मणः पुत्रा दक्षाद्याः साधकाः स्मृताः
षड्गुणं तु तपोलोकात्सत्यलोकान्तरं स्मृतम्
यस्मिन्न च्यवते भूयो ब्रह्मणं य उपासते
ऊर्द्ध्वभागस्ततोंऽडस्य ब्रह्मलोकात्परः स्मृतः
स चौर्द्ध्व संप्रचारो ऽस्य गत्यन्तश्चपरः स्मृतः
अधोगतीनां वक्ष्यामि भूतानां स्थानकल्पनाम्
नरको रौरवो घोरः शूकरस्ताल एवं च
कृमी च कृमिभक्षश्च लालाभक्षो विशंसनः
विष्टाकीर्णश्च नरको मूत्रकीर्ण स्तथैव च
अग्निज्वालो महाघोरः संदंशो ऽथाश्वभोजनः
अप्रतिष्ठो ऽथ वीचिश्च नरका ह्येवमादयः
येषु दुष्कृतकर्माणः पतन्तीह वृथक्पृथक्
रौरवे कूटसाक्षे तुमिथ्या यश्चाभिशसति
राधो गोध्रो भ्रूणहा च ह्यग्निदाता पुरस्य च
ताले पतेत्क्षत्रियहा हत्वा वैश्यं च मज्जति
सप्तकुम्भेष्वसौ गामी तथा राजभटश्च यः
साध्वीविक्रयकर्त्ता च यस्तु भक्तं परित्यजेत्
वेदं विक्रीणतेये च वेदं वै दूषयन्ति ये
अगम्यगामी च नरो नरकं शबलं व्रजेत्
दुरिष्टं कुरुते यस्तु कीडलोहं प्रपद्यते
रत्नं दूषयते यस्तु कृमिभक्षे प्रपद्यते
लालाभक्षे स तिष्ठेत्तु दुर्गन्धे नरके गतः
आरामे ऽप्यग्निदाता यः पतते स विशंसनि
नक्षत्रैर्जीवते यश्च नरो गच्छत्यधोमुखम्
क्षीरं सुरां च लवणं लाक्षां गन्धं रसं तिलान् एवमादीनि विक्रीणन्घोरे पूयवहे पतेत्
पक्षिणश्च मृगाञ्छागान्सो ऽप्येनं नरकं व्रजेत्