पवमानात्मजश्चैव कव्यवाहन उच्यते
देवानां हव्यवाहो ऽग्निः पितॄणां कव्यवाहनः
एतेषां पुत्रपौत्रास्तु चत्वारिंशन्न वैव तु
विश्रुप्तो लौकिको ऽग्निस्तु प्रथमो ब्रह्मणः सुतः
वैश्वानरः सुतस्तस्य वहन् हव्यं समाः शतम्
सोथर्वा लौकिको ऽग्निस्तु दर्पहाथर्वणः स्मृतः
तस्मात्स लौकिको ऽग्निस्तु दध्यङ्ङाथर्वणो मतः
स ज्ञेयो गार्हपत्यो ऽग्निस्तस्य पुत्रद्वयं स्मृतम्
द्वितीयस्तु सुतः प्रोक्तः शुको ऽग्निर्यः प्रणीयते
शंस्यस्तु षोडश नदीश्चकमे हव्यवाहनः
कावेरीं कृष्णवेणां च नर्मदां यमुनां तथा
विपाशां कौशिकीञ्चैव शतद्रूं सरयूं तथा
तासु षोडशधामानं प्रविभज्य पृथक्पृथक्
कृत्तिकाचारिणी धिष्णी जज्ञिरे ताश्च धिष्णयः
इत्येते वै नदीपुत्रा धिष्णीष्वेवं विजज्ञिरे
ताञ्शृणुध्वं समासेन कीर्त्यमानान्यथातथम्
विधीयन्ते यथास्थानं सूत्याहे सवने क्रमात्
सम्राडग्नि कृशानुर्यो द्वितीयोंऽतरवेदिकः
परिषत्पवमानस्तु द्वितीय सो ऽनुदिश्यते
हव्यस्ततो ह्यसंमृष्टः शामित्रे ऽग्नौ विभाव्यते
विश्वव्यचाः समुद्रो ऽग्निर्ब्रह्मस्थाने स कीर्त्यते
अचौकपादुपस्थो यः स वै शालासुखीयकः
शंस्यस्यैते सुताः सर्वे उपस्थेया द्विजैः स्मृताः
विभुः प्रवाहणो ऽग्नीध्रस्तेषां धिष्ण्यस्तथा परे
होत्रीयस्तु स्मृते ह्यग्निर्वह्निर्यो हव्यवाहनः
ततो ऽग्निर्वैश्वदेवस्तु ब्राह्मणाच्छंसिरुच्यते
आवारिरग्निर्वाभारिर्वैष्ठीयः स विभाव्यते
अष्टमः सुध्युरग्निर्योमार्जालीयः स उच्यन्ते
अपां योनिः स्मृतो ऽसौ स ह्यप्सुनामा विभाव्यते
अग्निः सो ऽवभृथे ज्ञेयो वरुणेन सहेज्यते