पुत्रम् आह महात्मानं गरुडं विहगाधिपम्
नेदं युक्ततरं पुत्र भूषणं विनयेन हि वर्तितुं युक्तम् इत्य् उक्तं वैपरीत्यं न युज्यते
नामित्रेष्व् अपि कर्तव्यं सद्भिर् जिह्मं कदाचन श्रोत्रिये चान्त्यजे वापि समं चन्द्रः प्रकाशते
कुर्वन्त्य् अनिष्टं कपटैस् त एव मम पुत्रक प्रसह्य कर्तुं ये साक्षाद् अशक्ताः पुरुषाधमाः
विनता च ततः प्राह कद्रूं तां सर्पमातरम्
किं कृत्वा शान्तिर् अभ्येति पुत्राणां ते करोमि तत् जरया तु गृहीतास् ते वद शान्तिं करोमि तत्
कद्रूर् अप्य् आह विनतां रसातलगतं पयः तेनाभिषेचितानां मे पुत्राणां शान्तिर् एष्यति
कद्र्वास् तद् वचनं श्रुत्वा रसातलगतं पयः क्षणेनैव समानीय नागांस् तान् अभ्यषेचयत् ततः प्रोवाच गरुडो मघवानं शतक्रतुम्
मेघाश् चाप्य् अत्र वर्षन्तु त्रैलोक्यस्योपकारिणः
तथा ववर्ष पर्जन्यो नागानाम् अभवच् छिवम् रसातलभवं गाङ्गं नागसंजीवनं पयः
जराशोकविनाशार्थम् आनीतं गरुडेन यत् यत्राभिषेचिता नागास् तन् नागालयम् उच्यते
गरुडेन यतो वारि आनीतं तद् रसातलात् तद् गाङ्गं वारि सर्वेषां सर्वपापप्रणाशनम्
जराया वारणं यस्मान् नागानाम् अभवच् छिवम् रसातलभवं गाङ्गं नागसंजीवनं यतः
जराशोकविनाशार्थं गङ्गाया दक्षिणे तटे साक्षाद् अमृतसंवाहा वञ्जरा साभवन् नदी
जरादारिद्र्यसंतापहारिणी क्लेशवारिणी रसातलभवा गङ्गा मर्त्यलोकभवा तु या
तयोश् च संगमो यः स्यात् किं पुनस् तत्र वर्ण्यते यस्यानुस्मरणाद् एव नाशं यान्त्य् अघसंचयाः
तत्र च स्नानदानानां फलं को वक्तुम् ईश्वरः सपादं तत्र तीर्थानां लक्षम् आहुर् मनीषिणः
सर्वसंपत्तिदातॄणां सर्वपापौघहारिणाम् वञ्जरासंगमसमं तीर्थं क्वापि न विद्यते यदनुस्मरणेनापि विपद्यन्ते विपत्तयः
देवागमं नाम तीर्थं सर्वकामप्रदं शिवम् भुक्तिमुक्तिप्रदं नॄणां पितॄणां तृप्तिकारकम्
तत्र वृत्तं समाख्यास्ये तव यत्नेन नारद देवानाम् असुराणां च स्पर्धाभूद् धनहेतवे
स्वर्गः सुराणाम् अभवद् असुराणाम् इलाभवत् कर्मभूमिम् अवष्टभ्य असुराः सर्वतो ऽभवन्
देवानां यज्ञभागांश् च दातॄन् घ्नन्त्य् असुरास् ततः ततः सुरगणाः सर्वे यज्ञभागैर् विना कृताः
व्यथिता माम् उपाजग्मुः किं कृत्यम् इति चाब्रुवन् मया चोक्ताः सुरगणा युद्धे जित्वासुरान् बलात्
भुवं प्राप्स्यथ कर्माणि हवींषि च यशांसि च तथेत्य् उक्त्वा गता देवा भूमिं ते समरार्थिनः
दैत्याश् च दानवाश् चैव राक्षसा बलदर्पिताः एकीभूत्वा ययुस् ते ऽपि जयिनो युद्धकाङ्क्षिणः
अहिर् वृत्रो बलिस् त्वाष्ट्रिर् नमुचिः शम्बरो मयः एते चान्ये च बहवो योद्धारो बलदर्पिताः
अग्निर् इन्द्रो ऽथ वरुणस् त्वष्टा पूषा तथाश्विनौ मरुतो लोकपालाश् च नानायुद्धविशारदाः
ते दानवाः सर्व एव याम्यां वै दिशि संगरे अकुर्वन्त महायत्नं दक्षिणार्णवसंस्थिताः
त्रिकूटः पर्वतश्रेष्ठो राक्षसानां पुराभवत् तद्वनेन ययुः सर्वे तैः सार्धं दक्षिणार्णवम्
सर्वेषां मेलनं यत्र पर्वतो मलयस् तु सः मलयस्यापि देशो ऽसौ देवारीणाम् अभूत् तदा